ՊԲ-ն և ՀՀ ԶՈւ-ն համապատասխան պլանավորում են իրականացնում. Սեյրան Օհանյան

Այսօր Հաղթանակի զբոսայգում էր պաշտպանության նախարար Սեյրան Օհանյանը:

Լրագրողների հետ զրույցում նա ասաց, որ Հայաստանի դիվանագիտությունն այսօր իրականացնում է իր առջև դրված խնդիրը` ԼՂՀ-ի աստիճանաբար ճանաչման ուղղությամբ:

«Դա դիվանագիտական շատ նուրբ, հետևողական աշխատանք է ենթադրում, և ՀՀ ռազմաքաղաքական ղեկավարությունն էլ է դրանով զբաղվում: Կարծում եմ` մենք ճիշտ ճանապարհին ենք»,- ասաց Սեյրան Օհանյանը:

Նախարարը նշեց, որ այսօր իրավիճակը սահմանին համեմատաբար հանգիստ է, ու թեև կրակոցներ եղել են, սակայն, Պաշտպանության բանակի ղեկավարության տեղեկատվությամբ, հակառակորդի խախտումներին տրվել են արժանի հակահարվածներ: 

Հարցին, թե արդյո՞ք շարունակվում է ադրբեջանական զորքերի կուտակումը Նախիջևանի սահմանին, նա պատասխանեց, որ պաշտպանության նախարարությունը հետևում է ամեն ինչին և արձանագրում յուրաքանչյուր փոքր փոփոխություն: Օհանյանի խոսքով` և'  ՊԲ-ն, և' Հայաստանի զինված ուժերը համապատասխան պլանավորում են իրականացնում, որն ուղղված է երկրի անվտանգության պահպանմանը:

Վերջում նախարարն ասաց. «Հայ ժողովուրդը հոյակապ, հիանալի ժողովուրդ է, և մենք պետք է յուրաքանչյուրի հետ կարողանանք աշխատել` մեր երկիրն ավելի զարգացած դարձնելու համար»: