Արևմտյան Վիրջինիան ճանաչել է Հայոց ցեղասպանությունը

ԱՄՆ Հայ Դատի գրասենյակը տեղեկացնում է, որ Արևմտյան Վիրջինիա նահանգը դարձել է ԱՄՆ 44-րդ նահանգը, որը ճանաչել է Հայոց ցեղասպանությունը:

Ըստ Asbarez-ի` Արևմտյան Վիրջինիայի նահանգապետ Էրլ Ռեյ Թոմբլինը 2016 թվականի ապրիլը հռչակել է նահանգում Ցեղասպանության իրազեկման և կանխարգելման ամիս։

 Վկայակոչելով ավելի քան 1,5 միլիոն հայերի և մեկ միլիոն հույների ու ասորիների սպանությունը 1915-1923 թվականներին և այժմ Միջին Արևելքում քրիստոնյաների, եզդիների և այլ փոքրամասնությունների նկատմամբ շարունակվող ցեղասպանությունը՝ Թոմբլինը նշել է, որ «ճանաչելով և մշտապես հիշելով Հայոց ցեղասպանությունը, Հոլոքոստը և նախկինում ու ներկայում շարունակվող բոլոր ցեղասպանությունները՝ մենք օգնում ենք պահպանել պատմական հիշողությունը և երաշխավորել, որ նման դաժանություններն այլևս չկրկնվեն»։

Կայքը տեղեկացնում է, որ Հայ Դատի անդամներ Համբարձում Գասպարյանը, Նանսի ու Ամի Թոլիվերները մեծ դեր են ունեցել նահանգի կողմից Ցեղասպանության ճանաչման հարցում:

Հայ դատի հանձնախմբի արևելյան մասնաճյուղի նախագահ Ստեֆեն Մեսրոպյանը ողջունել է հայտարարությունը:

 «Մենք ողջունում ենք Արևմտյան Վիրջինիային Հայոց ցեղասպանությունը հիշատակելու համար: Այդպիսով` այն դարձավ ԱՄՆ 44-րդ նահանգը: Սա ուժեղ ուղերձ է միջազգային համայնքին և Օբամայի վարչակազմին»,- ասել է Մեսրոպյանը: