Գիշերը Թալիշում զոհված Վազգենը կամավոր էր, երկու երեխաների հայր (լուսանկարներ)

Հակառակորդի կողմից կրակի դադարեցման պայմանավորվածության խախտման արդյունքում հյուսիսային (Թալիշ) ուղղությամբ մահացու վիրավորում ստացած 48-ամյա Վազգեն Հարությունյանը ԼՂՀ Շուշի քաղաքից էր: Yerkir.am-ի տեղեկություններով` Հարությունյանն Արցախյան ազատամարտի մասնակից էր, իսկ ապրիլյան մարտական գործողությունների ժամանակ կամավոր բարձրացել էր դիրքեր:

Մեզ հետ զրույցում Վազգենի հարազատները պատմեցին, որ նա սոցիալապես ծանր պայմաններում էր ապրում, երկու անչափահաս երեխաների հայր էր: Որդիներից մեկը սովորում է 4-րդ դասարանում, իսկ մյուսը հաշմանդամություն ունի: Վազգենը, որպես պահակ դպրոցում էր աշխատում:

Հիշեցնենք, որ ապրիլի 29-ի լույս 30-ի գիշերը ղարաբաղա-ադրբեջանական հակամարտ զորքերի շփման գծի ողջ երկայնքով հակառակորդը շարունակել է խախտել կրակի դադարեցման պայմանավորվածությունը` հրաձգային զինատեսակներից բացի, կիրառելով նաև 60 և 82 միլիմետրանոց ականանետներ ու տարբեր տիպի նռնականետներ: Հակառակորդի կողմից կրակի դադարեցման պայմանավորվածության խախտման արդյունքում հյուսիսային (Թալիշ) ուղղությամբ մահացու վիրավորում են ստացել ՊԲ զինծառայողներ Գարիկ Մնացականի Մովսիսյանը (ծնվ. 1997թ.) և Վազգեն Հենրիկի Հարությունյանը (ծնվ. 1968թ.):