Էրդողանն ազդվել է Սերժ Սարգսյանի հայտարարություններից

Թուրքիայի նախագահ Ռեջեփ Թայիփ Էրդողանը շարունակում է  միջամտել Ղարաբաղյան հարցին:

Ըստ Turkiyegazetesi-ի` Խորվաթիա այցի ընթացքում լրագրողների հարցերին պատասխանելիս Թուրքիայի նախագահն անդրադարձել է ՀՀ նախագահ Սերժ Սարգսյանի` պատերազմը վերսկսման հավանականության վերաբերյալ հայտարարությանը, ինչը, ըստ երևույթին, մեծ ազդեցություն է թողել Էրդողանի վրա:

«Ըստ իս` Հայաստանը կրակի հետ է խաղում: Այս բախումների մթնոլորտում Ադրբեջանն ու Իլհամ Ալիևը ուժեղանում են, իսկ ՌԴ-ն չի կարողանում լիարժեք աջակցել Հայաստանին: Առնվազն բացահայտ աջակցություն չի կարողանում ցուցաբերել, քանի որ Ադրբեջանի հետ համընկնող շահեր ունի: Ադրբեջանը նման չէ ո'չ Վրաստանին, ո'չ էլ Ուկրաինային: Ռուսաստանը նույնիսկ Ուկրաինայում չկարողացավ իր ուզած արդյունքին հասնել:  Միայն Ղրիմում կարողացավ հաջողության հասնել, քանի որ այնտեղ թաթար բնակչությունը քիչ էր: Ռուսաստանը սխալ է անում»,- հոխորտացել է Էրդողանը:

Էրդողանը նաև անուղղակիորեն սպառնացել է Թուրքիայում ապրող հայերին: «Թուրքիայում 100 հազար հայ կա: Նրանց կեսը Թուրքիայի քաղաքացիներ չեն: Կացության իրավունք չունեցողներին էլ ենք հանդուրժում: Նրանց անշարժ գույքն էլ վերադարձրեցինք: Ապրիլի 24-ին էլ ուղերձ հղեցինք: Մենք ցույց ենք տալիս, որ բարի նպատակներ ունենք»,- ասել է նա:

Haber.Star կայքն էրդողանի խոսքերը վերնագրել է` «Սարգսյանը կրակի հետ է խաղում»: