Դատելով ԵՄ պատասխանատուների հայտարարություններից` Վիլնյուսում մեզ այլեւս ոչինչ չի սպասվում

Թեեւ երեկ Սերժ Սարգսյանը եւ Վլադիմիր Պուտինը հանդես եկան համատեղ հայտարարությամբ, որ Հայաստանը մտնում է Մաքսային միություն, ԲՀԿ-ն առայժմ սպասում է արտաքին գերատեսչության ղեկավարների բացատրություններին, որից հետո նոր հանդես կգա համապատասխան հայտարարությամբ. ԱԺ-ում Yerkir.am-ի հետ զրույցում նշեց ԱԺ ԲՀԿ խմբակցության քարտուղար Նաիրա Զոհրաբյանը:

Ըստ նրա` այժմ որեւէ բան մեկնաբանել չեն կարող, քանի որ չունեն հստակ տեղեկություն, թե ինչ է շահելու դրանից Հայաստանը կամ ինչ է կորցնելու: 

«Միգուցե լավ է, միգուցե վատ է: Ես չգիտեմ, օրինակ, թե ինչ է սպասվում մեզ Վիլնյուսում նոյեմբերին, ինչ-որ բան սպասվո՞ւմ է, թե՞ չի սպասվում: Դատելով Եվրամիության պատասխանատուների հայտարարություններից` այլեւս ոչինչ չի սպասվում, բայց այդ մասին մեզ` խորհրդարանին, քաղաքական ուժերին պիտի տեղեկացնեն արտաքին գերատեսչության պատասխանատուները: Երբ իրենք հարկ կհամարեն գալ խորհրդարան եւ քաղաքական ուժերին տալ հստակ բացատրություն, տեղեկատվություն, այդ ժամանակ էլ, կարծում եմ, արժե ստանալ քաղաքական ուժերի մեկնաբանությունները»,- հայտարարեց Զոհրաբյանը եւ եւս մեկ անգամ ընդգծեց, որ զրոյական ինֆորմացիայի պայմաններում հրաժարվում է որեւէ բան մեկնաբանել:

Նա նշեց, որ րոպեներ առաջ Եվրախորհրդարանի արտաքին հարաբերությունների հանձնաժողովի նախագահը հստակ հայտարարել է, որ Ասոցացման պայմանագրի ստորագրման թեման կարելի է համարել փակված:

Զոհրաբյանը հարցը բարձրացնելու է խորհրդարանում, որպեսզի բանակցություններ վարողները հանդես գան համապատասխան բացատրություններով, բոլոր նրանք, ովքեր բանակցություններ էին վարում Ասոցացման պայմանագրի շուրջ, ովքեր տեղյակ են, թե ինչ է տալու մեզ Եվրասիական միությունը: «Միգուցե Եվրասիական միությունը նոր հեռանկարներ է բացում մեզ համար»,- նշեց պատգամավորը: