Ադրբեջանական բանակն, այո, երբեմն առաջատար է, բայց նայած` ինչ տեսակետից

Ադրբեջանի նախագահի օգնական Ալի Հասանովը հարցազրույցներից մեկի ժամանակ ասել է, թե շուտով Հայաստանի և Ադրբեջանի նախագահների մակարդակով բանակցություններ են սկսվելու:

ԼՂՀ նախագահի մամուլի խոսնակ Դավիթ Բաբայանը yerkir.am-ի հետ զրույցում նշեց, որ ժամանակը ցույց կտա` նման բան կլինի՞, թե՞ ոչ, բայց եթե լինի էլ, նրա կարծիքով, միակ թեման, որ պետք է և կարող է քննարկվել` խաղաղության և կայունության պահպանումն է:

Հասանովի հայտարարությանն էլ, թե այս օրերի իրադարձությունները ցույց տվեցին, որ ադրբեջանական բանակը լավագույնն է Հարավային Կովկասում, Բաբայանն արձագանքեց` այո, ադրբեջանական բանակը երբեմն առաջատար է, բայց նայած` ինչ տեսակետից: «Իհարկե, ադրբեջանական բանակն առաջին տեղում է զոհերի, կորցրած տեխնիկայի, ծախսած ռեսուրսների քանակով: Այս պարագայում միանգամայն պետք է համաձայնել, որ նրանք առաջնությունը բավականին ամուր կերպով պահպանում են և այդպես էլ թող առաջին տեղում մնան: Իսկ եթե մի քիչ լուրջ նայենք հարցին, ապա նման հայտարարություն անելիս Հասանովը պետք է պարզապես մտածեր, թե հետո՞ ինչպես է նայելու զոհված զինվորների մայրերի աչքերին: Շատ հեշտ է նստել Բաքվում` համակարգչի առջև, ու ինչ-որ հայտարարություններ անել»,- ասաց ԼՂՀ նախագահի մամուլի խոսնակը: