Թուրք ընկերոջ կողմից հայ կնոջ սպանության մասին սահմռկեցուցիչ մանրամասներ են հայտնի դարձել

Տեղեկացրել էինք, որ երեկ Պոլսում հայտնաբերվել էր 34 օր առաջ անհետացած` Գերմանիայի քաղաքացի, ազգությամբ հայ Ռիտա Դարի Վինքլերի դին: Թուրք ընկերոջը տեսնելու համար Անթալիայից Պոլիս եկած 39-ամյա վարսահարդար Վինքլերի դին հայտնաբերվել էր ընկերոջ՝ Ալի Քեմալ Ս.-ի բարեկամի աշխատավայրում՝ բետոնի մեջ թաղված:

Սահմռկեցուցիչ մանրամասներ են հայտնի դարձել կնոջ սպանության մասին: Համաձայն Haberedevam-ի՝  բետոնի մեջ թաղելուց առաջ ընկերը սղոցով կտրել է Ռիտայի սրունքները, ապա, թիկունքից կրակելով, սպանել նրան և, մարմինը թաքցնելով տակառում, այն թաղել բետոնի մեջ:

Ոստիկանությունն այժմ որոնողական աշխատանքներ է իրականացնում՝ հանցագործությունն իրականացնելու համար օգտագործված սղոցը, ինչպես նաև մարդասպանին գտնելու համար: Վերջին տեղեկությունների համաձայն՝ սպանությունից հետո նա Գերմանիա է փախել:

Ենթադրվում է նաև, որ հանցագործը սպանությունն ապացուցող իրերը նետել է ծովը, ծովում նույնպես որոնողական աշխատանքներ են իրականացվում:

Նշենք, որ մարդասպանի՝ սպանության մեջ մեղադրվող եղբայրը երեկ ձերբակալվել է: Սպանության պատճառը դեռևս չեն հայտարարում: