Լուծումը մեկն է. Փաշինյան

ԱԺ ՀԱԿ խմբակցության պատգամավոր Նիկոլ Փաշինյանն այսօր է վերադարձել Արցախից: Նա եղել է Ստեփանակերտում, Մարտակերտում, Թալիշ-Մատաղիս հատվածում:

Լրագրողների հետ զրույցում, խոսելով ստեղծված ռազմաքաղաքական վիճակի մասին, Փաշինյանը նշեց, որ ամենակարեւոր արձանագրումն այս պահի դրությամբ այն է, որ պետք է մոռանալ «զինադադար», «զինադադարի խախտում» հասկացությունները, որովհետև սա այլևս զինադադարի խախտում չէ, սա պատերազմ է: Պատգամավորն արձանագրեց հակառակորդի կողմից հրետանու կրակահերթերը, ականների պայթյունները ու անօդաչու սարքերի կիրառումը: «Մարտակերտ քաղաքի մեջ արկեր են պայթում»,- ասաց նա:

Պատգամավորի համոզմամբ՝ հակառակորդի` այս փուլի նպատակները ձախողվել են, նրանք փորձել են երկու ուղղությամբ մտնել Արցախ, և եթե այդ երկու անցումը ստացվեր, հաստատ դրան հետևելու էր կենտրոնից հարձակումը Ստեփանակերտ քաղաքի վրա: Բայց քանի որ հայկական զինված ուժերը կարողացել են հյուսիսում ու հարավում կասեցնել ներխուժման փորձը, հակառակորդը հասկացել է, որ պլանը չի հաջողվում իրականացնել:

Պատգամավորը հակիրճ իր տեսանկյունից ներկայացրեց ստեղծված ռազմաքաղաքական վիճակը: «Եթե մենք այս պահի դրությամբ զինադադար հաստատենք, որտե՞ղ է երաշխիքը, որ այն չի խախտվի մի քանի օր հետո: Եվ ենթադրենք` մենք ամրագրեցինք մեր դիրքերը մինչև ապրիլի 1-ի դրությամբ, որտե՞ղ է երաշխիքը, որ նրանց կողմից հարձակումներ չեն լինի: Ուստի, լուծումը, արցախցիների մեծ մասի կարծիքով, հետևյալն է՝ պետք է այս փուլում անել ամեն ինչ՝ Ադրբեջանին տարածքային լուրջ կորուստներ պատճառելու համար, որ գոնե երաշխիք ունենանք, որ Ալիևը շոկից մեկ տարի դուրս չգա»,- ասաց Փաշինյանը` հավելելով, որ խնդիրն այն է, որ մեր ռազմավարական նպատակը պետք է լինի շատ լուրջ և շոշափելի` տարածքային կորուստ պատճառել Ադրբեջանին, ասենք որևէ քաղաք պետք է անցնի մեր ԶՈՒ տրամադրության տակ:

Ըստ պատգամավորի` Հայաստանի իշխանությունները շատ հստակ պետք է հայտարարեն, որ Հայաստանը որևէ բանակցություն չի վարելու, որտեղ ներկայացված չլինի Արցախի կողմը: