Հայ Դատը կոչ է արել Օբամային` Սբ Կիրակոս եկեղեցու պետականացման հարցով ճնշում գործադրել Թուրքիայի վրա

ԱՄՆ Հայ դատի հանձնախումբը դիմել է ԱՄՆ նախագահ Բարաք Օբամայի վարչակազմին Տիգրանակերտի Սուրբ Կիրակոս հայկական եկեղեցու պետականացման հարցով:

Ըստ Asbarez-ի՝ ի պատասխան՝ Օբամայի վարչակազմի պաշտոնյաներից մեկն հայտնել է, որ Անկարայում ԱՄՆ դեսպանատունն ու Ադանայում հյուպատոսարանը ուշադիր հետևում են Թուրքիայի նախարարների խորհրդի որոշմանը և վերջին օրերին բարձրացրել են այդ հարցը տեղական ու պետական իշխանության մարմիններում։

Թուրքիայի կառավարությունը տեղյակ է պահել ԱՄՆ-ին հոգևոր շինությունները պետականացնելու որոշման մասին՝ «որպես բյուրոկրատական միջոց մարտական գործողությունների ընթացքում վնասված կառույցները վերանորոգելու համար»:  

Պատասխան հայտարարության մեջ ամերիկացի պաշտոնյան նշել է, որ տեղական դատարաններում արդեն հայցեր են ներկայացվել այս որոշման դեմ:

Հիշեցնենք, որ Թուրքիայում քրդամետ Ժողովուրդների դեմոկրատական կուսակցության հայ պատգամավոր Կարո Փայլանը երեկ այդ խնդրով գրավոր հարցեր էր ուղղել երկրի վարչապետ Ահմեդ Դավութօղլուին: