Պահքը մոտենում է ավարտին. մարմնի մաքրումը կարճ է տևում, հոգու մաքրումն է կարևոր

Պահեցողության միջոցով մարդու օրգանիզմից դուրս են գալիս գազանական երևույթները, և մարդ մաքրվում է. այսօր լրագրողներին ասաց Մայր Աթոռ Սուրբ Էջմիածնի միաբան, հոգեշնորհ տեր Տիրայր աբեղա Հակոբյանը:

Ըստ նրա` մարդիկ, որոնք այս կամ այն պատճառով այս շրջանում Պահք չեն պահել, բացը լրացնելու հնարավորություն ունեն` Ավագ շաբաթը լավագույն ժամանակահատվածն է:

Տեր Տիրայրը, սակայն, նշեց նաև, որ մարդու` ճշմարիտ քրիստոնյա լինելը չի սահմանվում միայն պահեցողությամբ, քանի որ մարդ կարող է առողջական ինչ-ինչ խնդիրներ ունենա և պահք չպահի, բայց հոգով ու սրտով ճշմարիտ քրիստոնյա լինի:

«Կան մարդիկ, ովքեր պահքը դիտարկում են որպես դիետա, սակայն մարդիկ մոռանում են` մարմնի մաքրումը կարճ է տևում, հոգու մաքրումն է կարևոր: Կան մարդիկ, ովքեր սննդի պահք չեն պահում, բայց ինչ-որ վատ սովորությունից են հրաժարվում պահքի շրջանում, սա էլ պահեցողության ձև է»,- ասաց տեր Տիրայրը: