Ջերմաստիճանը կիջնի մինչև -1-2. չի բացառվում, որ ցրտահարությունը կրկնվի

Առաջիկա օրերին ջերմաստիճանը կիջնի` ընդհուպ մինչև -1-2: Այսօր«Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանը լրագրողներին ասաց, որ օդի ջերմաստիճանը երեկ նվազել է 10-13 աստիճանով:

Այս պահին էլ, ըստ նրա, հանրապետության որոշ շրջաններում ձյուն է տեղում` Գորիսում ձյան շերտը հասնում է 24 սմ-ի, իսկ Ջերմուկում` 52-ի:

«Մարտի 17-18-ին առկա ամպամածությունը կիսով չափ կբացվի, ինչը նշանակում է, որ օդի ջերմաստիճանն ավելի կնվազի` Արարատյան դաշտում այն կհասնի -2-ի: Առաջիկա երեք օրերին սպասվում է ցրտահարություն, որի ինտենսիվությունը կախված է ամպամածության պատկերից»,- ասաց Սուրենյանը:

Նա տեղեկացրեց նաև, որ մարտի 20-ին շրջանների մեծ մասում սպասվում են տեղումներ` առատ ձյան տեսքով, հնարավոր է բուք: Մարտի 21-ին, սակայն, եղանակը կպարզվի, և չի բացառվում, որ ցրտահարությունը կրկնվի: