Ըստ թուրքական կայքի՝ Atlantic-ն աղավաղել է Օբամայի՝ Էրդողանի մասին խոսքերը

Ամերիկյան Atlantic պարբերականը աղավաղել է նախագահ Բարաք Օբամայի՝ Էրդողանի մասին խոսքերը. գրել է թուրքական AA գործակալությունը:

Կայքի հաղորդմամբ՝ Օբամայի հարցազրույցի մասին հայտարարությամբ հանդես եկած` ԱՄՆ ազգային անվտանգության խորհրդի խոսնակ Մարկ Ստրոհն իր զայրույթն է հայտնել այդ կապակցությամբ: «Նախագահը առանձնահատուկ կերպով արժևորում է Թուրքիային և այնտեղի իր գործընկերներին` որպես Եվրոպայի, Մերձավոր Արեւելքի և մահմեդական աշխարհի միջև կարևոր կամրջի»,- հայտարարել է նա:

Հիշեցնենք, որ ամերիկյան Atlantic-ն իր այսօրվա համարում հայտնել էր, որ ԱՄՆ նախագահ Բարաք Օբաման «կորցրել է պատրանքները», այսպես կոչված, «արաբական գարնան» իրադարձությունների կապակցությամբ: Ըստ կայքի՝ ԱՄՆ նախագահը հիասթափվել է Մերձավոր Արևելքի պետությունների և Թուրքիայի առաջնորդներից: