«Ժառանգություն»-ը սկսել է կարևորել ՏԻՄ ընտրությունները

ԱԺ «Ժառանգություն» խմբակցության պատգամավոր Զարուհի Փոստանջյանն այսօր լրագրողներին ասաց, որ «Ժառանգություն»-ը կմիանա ՀԱԿ խմբակցության ղեկավար Լևոն Զուրաբյանի առաջարկին՝ Ընտրական օրենսգրքի մշակման փուլում ստեղծել քաղաքական և քաղաքացիական հասարակության ուժերի համախմբում:

«Ժառանգություն»-ը միանում է ցանկացած միավորման, որը բերում է համակարգային փոփոխությունների, և եթե դա միտված է դրանց, ապա, իհարկե, «Ժառանգություն»-ը կունենա մասնակցություն»,- ասաց պատգամավորը` հավելելով. ««Ժառանգություն» կուսակցությունն առաջարկում է ընտրացուցակները մաքրել՝ երկրից բացակայող քաղաքացիների անունները հանելով ցուցակներից, քվեարկության ավարտից հետո ընտրությանը մասնակցած քաղաքացիների տվյալները պետք է հասանելի լինեն»:

Անդրադառնալով այս տարի սպասվող ՏԻՄ ընտրություններին՝ Փոստանջյանը նշեց, որ կուսակցությունում կարծում են, որ պետք է մասնակցել Վանաձորի և Գյումրիի քաղաքապետերի ընտրություններին, սակայն որոշում չունեն, թե ովքեր են մասնակցելու: «Քննարկման փուլում է գտնվում այդ հարցը, շուտով դուք կիմանաք, թե «Ժառանգություն»-ն ինչ ձևաչափով մասնակցություն կունենա ՏԻՄ ընտրություններին: Մենք շատ ենք կարևորում այդ ընտրությունները, այդտեղ մեր մասնակցությունը պետք է լինի լիարժեք»,- նշեց նա: