Գազատարների ուղեգծի հատակագծի ձեռք բերման նպատակով 3 մլն 266 հազար դրամ կհատկացվի

Կառավարության այս շաբաթվա նիստի օրակարգում ընդգրկված է որոշում, համաձայն որի` Եվրոպական ներդրումային բանկի և Եվրոպական հանձնաժողովի միջոցների հաշվին Հայաստանի Հանրապետության և Միավորված ազգերի զարգացման ծրագրի միջև 2012 թվականի օգոստոսի 27-ին կնքված համաֆինանսավորման համաձայնագրի հիման վրա «Հայաստանի Հանրապետության պետական սահմանի «Բագրատաշեն», «Բավրա» և «Գոգավան» անցման կետերի արդիականացում» ծրագրի շրջանակներում Միավորված ազգերի զարգացման ծրագրի կողմից կառուցված ու Հայաստանի Հանրապետության Տավուշի, Շիրակի և Լոռու մարզերի համապատասխան համայնքներին նվիրաբերվող գույքի նկատմամբ իրավունքների պետական գրանցման համար պահանջվող՝ գազատարների ուղեգծի հատակագծերի ձեռք բերման նպատակով կառավարությանն առընթեր անշարժ գույքի կադաստրի պետական կոմիտեին 2016 թվականի առաջին եռամսյակում հատկացվում է 3,266.4 հազ. դրամ` 2016 թվականի պետական բյուջեով նախատեսված կառավարության պահուստային ֆոնդի հաշվին (բյուջետային ծախսերի տնտեսագիտական դասակարգման «Մասնագիտական ծառայություններ» հոդվածով):

Սույն որոշումն ուժի մեջ մտնելուց հետո կնքվում է գազատարի ուղեգծի չափագրման աշխատանքների իրականացման համար համապատասխան պայմանագիր՝ սահմանելով 1 կիլոմետր գազատարի չափագրման արժեքը 120.0 հազ. դրամ:

Հայաստանի Հանրապետության պետական սահմանի «Բագրատաշեն», «Բավրա» և «Գոգավան» անցման կետերի արդիականացում» ծրագրի շրջանակներում Միավորված ազգերի զարգացման ծրագրի կողմից կառուցվել են գազատարներ, որոնք պետք է հանձնվեն համապատասխան համայնքներին, սակայն նշված գազատարների չափագրման համար համապատասխան գումար չի հատկացվել: Որոշման նախագծի ընդունմամբ կիրականացվի գազատարների նկատմամբ իրավունքների պետական գրանցումը, գազատարները համայնքներին անհատույց  հանձնումը և գազատարները «Գազպրոմ Արմենիա» ՓԲԸ-ին անհատույց օգտագործման տրամադրումը: