Ղարաբաղյան մի անեկդոտի համաձայն՝ Դարվինը, ընդհանուր առմամբ, ճիշտ է, բայց ոչ` ղարաբաղցիների պարագայում

Yerkir.am-ի զրուցակիցն է ԱԺ պատգամավոր Թեւան Պողոսյանը:

- 2015-ի ձեռքբերումը:

- Մեր բանակը հպարտության մեծ զգացումներ է մեզ պարգևել:

- Տարվա կորուստը:

- Մեր զոհերն առաջնագծում: Բոլորս ենք պարտավոր մեր հերոսների հիշատակը բարձր պահել:

-Սպասելիքը 2016-ից:

- Խաղաղություն աշխարհում:

 - 2015-ի Տարվա կինը, ինչո՞ւ:

- Կինս: 1995-ից ի վեր ամեն տարի նա է ինձ համար տարվա կինը:

-2015-ի ամենահաջող քաղաքական գործիչը:

-Շատ են, անուններ չտամ երևի. բոլոր նրանք, ովքեր կարողացան իրենց պատկերացումները կյանքի կոչել՝ կառույց ստեղծել, գաղափար իրագործել կամ երկրի շահն առաջ տանել:

-Ամենաանհաջողը:

- Էլի շատ են: Խոստումներ տված ու այդ խոստումները կյանքի չկոչածները:

-2015-ի ամենատպավորիչ հայաստանյան իրադարձությունը:

- 2015թ. խորհուրդը մեր համար եղել է աշխարհում Հայոց ցեղասպանության ճանաչման արշավը և ապացույցը, որ մենք եղել ենք, կանք ու կլինենք:

-2015-ին աշխարհում ի՞նչ փոխվեց:

- Վերջապես եկան գիտակցման, որ առանց բոլորի ջանքերի միավորման ահաբեկչության դեմ պայքարն անհնարին է:

 -Այծի /2015-ը այծի տարի էր/ ամենացավոտ պոզահարումը` Ձեզ:

- Հարազատների մահերը և Հայաստանը լքելը:

 -Իսկ երկրի՞ն:

 -Արտագաղթը և տնտեսական անկումը կառավարման սխալների պատճառով:

-Ի՞նչ մկկաց այծը Ձեր ականջին հրաժեշտից առաջ:

-Ամեն ինչ լավ է լինելու:

-Հիմա` մի քիչ հումոր, անցնենք կապիկներին: Կապիկն ու կապիկությունը տարբեր բանե՞ր են:

- Հիմա նաև հումորն էլ կստացվի: Կապիկը կենդանի է: Կապիկությունը` մարդկանց կողմից վարքագիծ: Ավելի լավ կլիներ գոնե կապիկներին նմանակելուց դրականը կարողանայինք վերցնել:

-Համաձա՞յն եք տեսությանը, որ մարդիկ առաջացել են կապիկներից:

- Ղարաբաղյան մի անեկդոտի համաձայն՝ Դարվինը, ընդհանուր առմամբ, ճիշտ է, բայց ոչ` ղարաբաղցիների պարագայում:

-Կապիկություն անելը մարդի՞կ են կապիկներից սովորել, թե՞ կապիկները` մարդկանցից:

 - Շարժուձևը մենք ենք սովորել, իսկ այդպիսին համարվող վարքն արդեն սեփական նախաձեռնություն է: Կապիկները մեզանից սովորել են «կապիկություն» անելու վնասակարությունը:

 -Կապիկի դերն ու նշանակությունը հայ քաղաքականության պատմության մեջ:

-Դե գիտեք` Երևանում կրկեսը ժամանակավոր փակել են, բայց, որպեսզի շատ չտխրենք, կարելի է հետևել քաղաքական դաշտին:

 -Քաղաքականության մեջ կապիկությունն արհե՞ստ է, թե՞ արվեստ:

- Ճիշտ քաղաքականություն վարելն ինքնին արվեստ է, ու դա է ինձ միայն դուր գալիս:

-Ի՞նչ պետք է սովորել կապիկից:

-Ճկունություն, շարժունակություն, համախմբվածություն, ուժ, սեր … Լավ, համոզեցիք, երբեմն նաև կապիկություն /ժպտում է/: