Ֆինանսների նախարարության պարզաբանումը «ճոխ» օճառամանի բարձր արժեքի վերաբերյալ

Այսօր կառավարության նիստում ՀՀ ֆինանսների փոխնախարար Արմեն Ալավերդյանը ներկայացրեց որոշում ՀՀ  2015 թվականի պետական բյուջեում և ՀՀ կառավարության 2014 թ. մի որոշման մեջ փոփոխություններ ու լրացումներ կատարելու և ֆինանսների նախարարության գնման պայմանագրերում փոփոխություններ կատարելու մասին: Առաջարկվում է ֆինանսների նախարարության արտաբյուջետային միջոցների վերաբաշխում կատարել, մասնավորապես` Դիլիջանի ուսումնական կենտրոնի հետ կապված. դեպի ուսումնական կենտրոն տանող ճանապարհի կառուցման աշխատանքների ժամկետը առաջարկվում է տեղափոխել 2016թ. սեպտեմբեր, քանի որ ֆինանսների նախարարության արտաբյուջետային միջոցները չեն բավականացնում`  ներմուծումների նվազման հետ կապված մաքսային միջոցների նվազման պատճառով:

Վարչապետը Արմեն Ալավերդյանից հարցրեց, թե ի՞նչ մամուլի հրապարակումներ են` Դիլիջանում կառուցվող այդ ուսումնական կենտրոնի հետ կապված: Նշենք, որ մամուլի հրապարակումները բացահայտում են, որ Դիլիջանի ուսումնական կենտրոնի կառուցման նպատակով կատարվել են անտրամաբանական, ճոխ ծախսեր: Օրինակ` մեկ օճառամանի վրա ծախսվել է ավելի քան 40 հազար դրամ:

Արմեն Ալավերդյանը պատասխանեց, որ այդ հրապարակումներին ֆինանսների նախարարությունն արձագանքել է` պարզաբանում տեղադրելով նախարարության պաշտոնական կայքէջում: «Ֆինանսների նախարարությունը հերքել է այն լուրերը, թե անիրատեսական գնումներ են կատարվել, որովհետև ապրանքները, որոնց մասին մամուլում գրվել է, ճիշտ չեն ներկայացվել: Բերեմ օրինակ` օճառաման: Նկատի են ունեցել այն ապրանքը, որը եվրոպական արտադրության է, նախատեսված է ոչ թե մեկ անգամվա օգտագործման, այլ` բազմակի: Այդ ապրանքները ձեռք են բերվել «Իդեալ համակարգ» խանութից, և այդ ապրանքները, իրենց որակի հետ կապված, համապատասխանում են իրենց արժեքին: Մնացած հրապարակումներին նույնպես պարզաբանումներ կտանք: Մենք գնումներն իրականացնում ենք բացառապես օրենքի շրջանակներում»,- ասաց փոխնախարարը:

Վարչապետը հավելեց, որ անպայման պետք է մանրամասն պարզաբանում տալ` մամուլի այդ հրապարակումների հետ կապված: