Ռուսական ինքնաթիռը բռնկվել է, բաժանվել 2 մասի կամ անկում ապրել. մասնագետները տարբեր վարկածներ են առաջ քաշում

Եգիպտոսում վթարի ենթարկված ռուսական Airbus 321 ինքնաթիռը  կործանվել է օդում, բայց աղետի պատճառների մասին եզրակացություններ անել դեռ վաղ է: Այդ մասին հայտարարել է Ռուսաստանի ԱԻՆ փոխնախարար Վլադիմիր Ստեպանովը, գրում է ՏԱՍՍ-ը:

«Ինքնաթիռը կործանվել է օդում, և բեկորներն ընկել են մեծ տարածության վրա»,- ասել է ռուս պաշտոնյան:
Իր հեթին օդային տրասպորտի ենթակառուցվածքների զարգացման «Քաղավիացիայի գործընկեր» հիմնադրամի  նախագահ, ԽՍՀՄ վաստակավոր օդաչու Օլեգ Սմիրնովը վստահություն է հայտնել, որ ինքնաթիռն ամենայն հավանականությամբ երկու մասի է բաժանվել` օդում արագ պտտվելու հետեւանքով:

Պտտվելու ընթացքում ինքնաթիռը հայտնվել է անվերահսկելի քաոսում տասներորդական վայրկյաններ, եւ օդաչուն պարզապես հնարավորություն չի ունեցել տեղեկացնելու իրավիճակի մասին, ասել է Սմիրնովը:

Նրա կարծիքով ինքնաթիռի արագությունը կտրուկ անկում է ապրել, ինչը կարող է մեկ կամ երկու շարժիչի հանկարածակի կանգնելու պատճառով լինել:

Փորձագետը նաեւ բացառել է, որ ինքնաթիռը կարող էր 2 մասի բաժանվել արտաքին կամ ներքին պայթյունի հետեւանքով:

Մինչդեռ ՌԴ տրանսպորտային գերատեսչության այլ աղբյուրներ հայտնում են, որ ինքնաթիռն օդում բռնկվել է` որպես ապացույց բերելով ինքնաթիռի  թեւի բեկորի ֆիզիկական-ջերմային վիճակը:

 Արեւմտյան փորձագետները նույնպես տարբեր վարկածներ են առաջ քաշում: CNN հեռուստաընկերության ավիացիոն փորձագետ Ռիչարդ Քվեսթի կարծիքով,  А321-ն աերոդինամիկ անկում է ապրել:  Որոշ տվյալներ վերլուծելով` նա եզրահանգել է,  որ  ինքնաթիռը թռիչքի առաջին 20 րոպեում հասել է պահանջված բարձրության վերջին կետին եւ միանգամից անկում ապրել.  անձնակազմը պարզապես չի հասցրել ահազանգել դիսպետչերներին:

Քվեսթը պարզել է նաեւ, որ նույն ինքնաթիռի հետ  2001 թվականին Բեյրութ-Կահիրե չվերթի ժամանակ միջադեպ է տեղի ունեցել: Վայրէջքի ժամանակ  պոչային հատվածով հարվածել է թռիչքուղուն:  Դրանից հետո թերությունը վերացվել է, ասել է Քվեստը` շեշտելով, որ միջադեպը կարող է  եւ բացարձակապես կապ չունենալ այս վթարի  հետ: