Կիպրոսի թուրքական մասի առաջնորդը հայտարարել է, որ իր համայնքը համաձայն չէ ապրել «հունական լծի տակ»

Ինքնահռչակ Հյուսիսային Կիպրոսի թուրքական հանրապետության  նախագահ Էրսին Թաթարը երկուշաբթի հայտարարել է, որ կիպրոսցի թուրքերը երբեք չեն հրաժարվի իրենց ինքնիշխանությունից, քանի որ չեն պատրաստվում ապրել «հունական լծի» տակ: Կիպրոսի թուրքական մասի առաջնորդի հռետորաբանության խստացման մասին, Կիպրոսի կարգավորման գագաթնաժողովին ընդառաջ, որը պատրաստվում է անցկացնել ՄԱԿ-ի Գլխավոր քարտուղար Անտոնիո Գուտերեշի կողմից, հաղորդում է կղզու թուրքական Kibris թերթը:

«Թուրքիայի՝ երաշխավոր տերության կարգավիճակի պահպանումը, Կիպրոսում թուրքական զորքերի առկայությունը, մեր ինքնիշխանությունն ու քաղաքական հավասարությունը մեր կարմիր գծերն են, և մենք երբեք չենք հրաժարվի դրանցից: Որովհետև հրաժարվել դրանցից՝ նշանակում է Հունաստանի լծի տակ լինել»,- Թաթարին մեջբերում է պարբերականը:

Չճանաչված պետության ղեկավարը հասկացրել է, որ իր հայտարարության պատճառը ՄԱԿ-ում Կիպրոսի մշտական ներկայացուցիչ Անդրեաս Մավրոյանանիի խոսքերն են, որը բացատրել է, որ կիպրական կողմը չի կարող ընդունել ինքնիշխան հավասարության սկզբունքը, քանզի դա վերջ կդնի Կիպրոսի Հանրապետության գոյությանը: Այս առնչությամբ ՀԿԹՀ նախագահն ասել է, որ մշտական ներկայացուցչի նման դիրքորոշումը վկայում է այն մասին, որ «կիպրահույների» մտածելակերպը չի փոխվել, և նրանք իրենց համարում են կղզու միակ տերերը, որտեղ կիպրոսցի թուրքերին տրվում է  փոքրամասնության դեր։

Հիշեցնենք, որ նման հայտարարություն էր արել նաև Թուրքիայի նախագահ Ռեջեփ Թայիփ Էրդողանը. ըստ թուրքական կողմերի (Թուրքիայի և չճանաչված ՀԿԹՀ-ի)՝ խնդրի լուծումը կղզու թուրքական մասին անկախություն շնորհելն է, իսկ հունական կողմերը (Հունաստանը և Կիպրոս) նշում են, որ թուրքական հատվածի՝ դաշնային կարգավիճակով Կիպրոս պետության մեջ գոյատևելն է։