Հայտնի են Պերմյակովի նկատմամբ հայկական կողմի նշանակած դատահոգեբանական-դատահոգեբուժական փորձաքննության արդյունքները

Հունվարի 12-ին Գյումրիում Ավետիսյանների ընտանիքի 7 անդամների սպանության մեջ մեղադրվող Վալերի Պերմյակովի վերաբերյալ հայկական կողմի նշանակած համալիր դատահոգեբանական–դատահոգեբուժական փորձաքննության եզրակացությունը ստացվել է: Այս մասին yerkir.am-ին հայտնեց Ավետիսյանների իրավահաջորդների ներկայացուցիչներից Երվանդ Վարոսյանը:

Հիշեցնենք, որ Պերմյակովի նկատմամբ նման փորձաքննություն նշանակել էր ռուսական կողմը: Գյումրիի ռուսական կայազորի դատարանում Պերմյակովի դասալքության, նրա կողմից զենքի հափշտակության և կրելու գործով նիստի ընթացքում հրապարակված դատահոգեբուժական, դատահոգեբանական համալիր փորձաքննության եզրակացության համաձայն` Պերմյակովի մոտ հոգեկան առողջության հետ կապված խնդիրներ չկան: Նա ագրեսիվ վարք ու թմրանյութերից կախվածություն չունի և պիտանի է ծառայության: Սակայն նիստին ներկա` Ավետիսյանների իրավահաջորդների ներկայացուցիչները նկատել էին, որ Պերմյակովի վարքը տարօրինակ է:

Նշենք, որ հայկական կողմի նշանակած փորձաքննության արդյունքներով` Պերմյակովը մեղսունակ է ճանաչվել: