Հայտնի են էքստրասենսի սպանության գործով նշանակված կենսաբանական փորձաքննության արդյունքները

Էքստրասենս Անի Մաջնունյանի սպանության գործով ստացվել են կենսաբանական փորձաքննության արդյունքները: Այս մասին yerkir.am-ին հայտնեց սպանության մեջ մեղադրվող Մուշեղ Մխիթարյանի պաշտպան Մարինե Ֆարմանյանը: Ըստ նրա՝ փորձաքննությամբ պարզվել է, որ Անի Մաջնունյանի և Մուշեղի արյան խմբերը համընկնում են, և Անիի հագուստի վրա հայտնաբերված արյան հետքերը կարող էին պատկանել ինչպես տուժածին, այնպես էլ Մուշեղին:

Պաշտպանը նաև տեղեկացրեց, որ մոտ օրերս պատրաստ կլինեն Մուշեղ Մխիթարյանի նկատմամբ նշանակված դատահոգեբանական և դատահոգեբուժական համալիր փորձաքննության արդյունքները:

Հիշեցնենք, որ 2015թ. օգոստոսի 5-ին Երեւանի Մազմանյան 5 շենքի թիվ 20 բնակարանում հայտնաբերվել է «6-րդ զգայարան» հաղորդաշարի էքստրասենս` 53-ամյա Անի Մաջնունյանի դին՝ բազմաթիվ ծակած-կտրած վնասվածքներով: Դեպքի առիթով Աջափնյակ եւ Դավթաշեն վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 104 հոդվածի 2-րդ մասի 8-րդ կետով (սպանություն՝ զուգորդված ավազակությամբ): Մեղադրանք է ներկայացված 20-ամյա Մուշեղ Մխիթարյանին, նա կալանավորված է: Մխիթարյանը «Յանուս» թատրոնի գեղարվեստական ղեկավարն էր: