Զախարյանն Իրանում քննարկել է ՀՀ մատակարարվող գազի դիմաց էլեկտրաէներգիայի փոխանակման ծրագրի վերաբերյալ հարցեր

Հոկտեմբերի 3-5-ը կայացել է ՀՀ էներգետիկայի և բնական պաշարների նախարար Երվանդ Զախարյանի այցը Իրան։ Այցի շրջանակներում սեպտեմբերի 4-ին նախարար Զախարյանը հանդիպում է ունեցել Իրանի էներգետիկայի նախարար Համիդ Չիտչիանի, նավթի նախարար Բիժան Զանգյանեի և Իրանի արտահանման զարգացման բանկի գործադիր տնօրեն Ալի Սալեհաբադիի հետ։

Համիդ Չիտչիանի հետ հանդիպման ընթացքում նախարար Զախարյանն անդրադարձել է երկկողմ ծրագրերի իրականացման ընթացքին, այդ թվում՝ բարձրավոլտ էլեկտրահաղորդման 3-րդ գծին, Մեղրիի ՀԷԿ-ին վերաբերող հարցերի։

Նախարար Զանգյանեի հետ քննարկվել են Իրանից Հայաստան մատակարարվող գազի դիմաց էլեկտրաէներգիայի փոխանակման ծրագրի վերաբերյալ հարցեր: Հատուկ անդրադարձ է եղել բարձրավոլտ էլեկտրահաղորդման 3-րդ գծի կառուցումից հետո գազի և էլեկտրաէներգիայի ծավալների ավելացման խնդրին։ 

Իրանի արտահանման զարգացման բանկի գործադիր տնօրեն Ալի Սալեհաբադիի հետ հանդիպման ընթացքում նախարար Զախարյանը գոհունակությամբ նշել է, որ բանկի շնորհիվ լուծվել է բարձրավոլտ էլեկտրահաղորդման 3-րդ գծի ֆինանսավորման հարցը, և շինարարական աշխատանքները սկսելու համար անհրաժեշտ սարքավորումներն արդեն տեղափոխվել են Հայաստան: Նա հույս է հայտնել, որ ծրագիրը կիրականացվի նախանշված ժամկետներում։