ՀԷՑ-ը ներդնում է հոսանքի նոր սակագնի հիման վրա հաշվարկվող վճարումների փաթեթ

Ներկայումս  «Հայաստանի էլեկտրական ցանցեր» ընկերության  կողմից ներդրվում է ծրագրային այն փաթեթը, որի միջոցով հաշվարկվելու են բաժանորդների ծախսերը/վճարումները ս.թ. օգոստոսի 1-ից ուժի մեջ մտած էլեկտրաէներգիայի սակագների հիման վրա: 

 Հաղորդվում է, որ բնակիչ-բաժանորդներն իրենց անդորրագրի վրա հնարավորություն կունենան տեսնել ծախսած էլեկտրաէներգիայի արժեքը նոր սակագնով, ինչպես նաև հաշվիչի ցուցմունքները: Առանձին նշված կլինեն ինչպես բաժանորդի կողմից վճարման ենթակա գումարը, այնպես էլ ՀՀ կառավարության կողմից սուբսիդավորվող գումարը:

Այս մասին հայտնում է ՀԷՑ-ի պաշտոնական կայքը:

 Հիշեցնենք, որ օգոստոսի 1-ից սպառողների համար  հոսանքի սակագինը 1 ԿՎՏ/ ժամի դիմաց ավելացել է մոտ 7 դրամով, որը փոխհատուցելու ծախսերը հանձն է առել կառավարությունը՝ մինչև աուդիտի անցկացումն ու եզրակացությունը:

ՓՄՁ-ների մասով Ընկերությունը հաշիվներ դուրս կգրի նույն սկզբունքով:

 Հավելվում է, թե քանի  որ հաշիվների դուրսգրման նոր մեխանիզմը կարող է տարընթերցումների առիթ հանդիսանալ, «ՀԷՑ»-ը  պատրաստ է յուրաքանչյուր բաժանորդի տրամադրել ծախսերի/վճարումների հետ կապված իրեն հետաքրքրող տեղեկատվությունը: