Շիրակում 21 երեխա է թունավորվել, մեծահասակներից միայն գյուղապետն է տուժել

Դարձյալ թունավորման դեպք է արձանագրվել, այս անգամ` Շիրակի մարզի Ձիթհանքով գյուղում: Yerkir.am-ի հետ զրույցում համայնքի ղեկավար Հովիկ Պողոսյանը նշեց, որ 21 երեխա է թունավորվել` 2-15 տարեկան: Գյուղապետն ինքն էլ թունավորվել է: «Մեծերից մենակ ես եմ թունավորվել, հիմա կաթիլային եմ ընդունում: Երեխաներից էլ երկուսին են տեղափոխել հիվանդանոց»,- ասաց Պողոսյանը:

ՀՀ առողջապահության նախարարությունն էլ հայտնում է, որ երեկ տեղեկատվություն էին ստացել Շիրակի մարզի Անիի տարածաշրջանի Ձիթհանքով համայնքից դպրոցահասակ 2 երեխայի Գյումրու ինֆեկցիոն հիվանդանոց հոսպիտալացնելու մասին: Անհապաղ իրականացվել են համաճարակաբանական հետազոտություն և բակային համայցեր: Արդյունքում` ևս 2 երեխա հոսպիտալացվել է: Հնարավոր է, որ նրանք այսօր դուրս գրվեն։ Բոլորի վիճակը բավարար է։

Միաժամանակ, հայտնաբերվել է աղիքային վարակներին բնորոշ գանգատներով ևս 28 հիվանդ, որոնք գտնվում են ամբուլատոր հսկողության տակ: Դպրոցում կատարվել են նմուշառում բոլոր կոնտակտավոր երեխաներից, սննդի կառուցահատվածից, խմելու ջրից: Կատարվում են քիմիական և մանրէաբանական լաբորատոր հետազոտություններ, աշխատանքներ են տարվում վարակի աղբյուրը բացահայտելու ուղղությամբ: