Սեպտեմբերի 1-ը սահմանամերձ Բաղանիսում հանգիստ չի անցել

Երեկ երեկոյան և այսօր հակառակորդն ինտենսիվորեն կրակոցներ է արձակել Տավուշի մարզի սահմանամերձ գյուղերի ուղղությամբ: Yerkir.am-ի հետ զրույցում Բաղանիսի գյուղապետ Նարեկ Սահակյանն ասաց, որ կրակոցներն արձակվել են առավոտյան ժամը 11-ի սահմաններում: «Բարեբախտաբար, դպրոցի տոնական միջոցառումը տեղի է ունեցել, և մարդկային կորուստներ չկան»,- ասաց գյուղապետը և հավելեց, որ, շնորհիվ մեր սահմանապահների, իրավիճակը խաղաղվել է:

Միջոցառմանը ներկա` Հայ օգնության միության (ՀՕՄ) անդամները նույնպես ականատես են եղել կրակոցներին: Yerkir.am-ի հետ զրույցում ՀՕՄ-ի ատենապետուհի Նարինե Գալստյանը հայտնեց, որ «Ամուր սահման` հզոր հայրենիք» նախաձեռնության շրջանակներում գրենական պիտույքներ էին տարել սահմանամերձ գյուղերի, այդ թվում` Բաղանիսի տարրական դասարանների աշակերտների համար: Գալստյանը պատմեց, որ գյուղ այցելած ՀՕՄ-ուհիները լսել են կրակոցների ձայները: