Բաղանիսում վիրավորներ չկան, բայց նյութական վնասներ են կրել

Տեղեկացրել էինք, որ երեկ` ժամը 17:30 ի սահմաններում, Տավուշի մարզի` հայ-ադրբեջանական պետական սահմանի Բաղանիս գյուղի հատվածում ադրբեջանական զինված ուժերի ստորաբաժանումները դիվերսիոն փորձ են իրականացրել:

Yerkir.am-ի հետ զրույցում Բաղանիսի գյուղապետ Նարեկ Սահակյանը նշեց, որ  կրակոցները ընդհատումներով շարունակվել են մինչև կեսգիշեր, իսկ կեսգիշերից հետո իրավիճակը կայունացել է, լարվածությունը հիմնականում եղել է երեկոյան` ժամը 22-ից հետո:

«Բարեբախտաբար, վիրավորներ չունենք, բայց նյութական վնասներ ենք կրել: Կրակում էին հիմնականում տների ուղղությամբ: Մի քանի գնդակներ դիպչել են տների տանիքներին, պատերին ու ապակիներին»,- ասաց Սահակյանը` հավելելով, որ ներկա պահին գյուղում կյանքն ընթանում է բնականոն հունով: