ՀՅԴ-ն վճռական է. պետության հիմքում դրվում է Դաշնակցության տեսլականը

 Այսօր Դաշնակցության Հայաստանի Գերագույն մարմնի հրավերով կայացավ կուսակցության 11 մարզային կոմիտեների անդամների, 50 կոմիտեների, նաեւ Դաշնակցության ուսանողական եւ երիտասարդական կազմակերպությունների ներկայացուցիչների հետ հանդիպում:

Հանդիպման ժամանակ ՀՅԴ Գերագույն մարմնի ներկայացուցիչ Աղվան Վարդանյանն ընդգծեց այն հանգամանքը, որ հանրային քննարկման ներկայացված սահմանադրության նախագիծը կարելի է դիտել կարեւոր ձեռքբերում կուսակցության համար, հայտնում է Yerkirmedia.am-ը։

«Մենք մտնում ենք մի կարեւոր փուլ՝ քարոզչության մի փուլ, բայց կարեւոր է, որ մեր ընկերներն անխտիր համոզված լինեն, որ մենք ճիշտ ճանապարհի վրա ենք։ Այսօր մեր պետության հիմքում դրվում է Դաշնակցության տեսլականը։ Մինչեւ մեր կուսակցության յուրաքանչյուր անդամ վստահ չլինի, որ այս բարեփոխումները ճիշտ ուղու վրա են, չենք կարող մեր կողքինին համոզել»,- ասաց Աղվան Վարդյանը:

Կուսակցության ղեկավար մարմիները մինչեւ սեպտեմբերի վերջ կուսակցության մարզային կառույցներում  հանդիպումներ են կազմակերպելու։

ՀՅԴ բյուրոյի քաղաքական ներկայացուցիչ Արմեն Ռուստամյանն էլ վստահություն հայտնեց, որ հանրաքվեն հաջողվելու է: 

Սահմանադրական բարեփոխումների անհրաժեշտությունը պետք է դիտարկել երկրում կայունության ապահովման, ազգային անվտանգության ու ինքնիշխանության երաշխիքների ապահովման տեսանկյունից։ ՀՅԴ Բյուրոյի ներկայացուցիչ Հրանտ Մարգարյանը նշեց, որ ներկա է եղել բարեփոխումների հետ կապված բոլոր բանավեճերին, քննարկումներին եւ փոխանցեց, որ տեսել է, թե ինչպես են Դաշնակցության տեսակետները հաղթանակել։  

 «Մենք մեր սկզբունքներից չենք զիջել. սա է, որ պետք է դարձնենք հաղթաթուղթ։ Այս պայքարը՝ Դաշնակցության պայքարն է։ Մեր բոլոր կուսակցականները պետք է դառնան քարոզիչներ, ակտիվ դերակատարներ՝ համոզելու համար փոփոխությունների առավելությունները, որոնք ակնհայտ են։ Անձի իշխանությունը փոխարինվում է կոլեգիալ, հավաքական իշխանությամբ, կուսակցությունների դերը մեծանում է»,- ասաց Հրանտ Մարգարյանը: