Ակնկալում ենք իրավապահների անհապաղ քայլերը` ոստիկանին պատասխանատվության ենթարկելու ուղղությամբ.ՄԻՊ

Հայաստանի ՄԻՊ Կարեն Անդրեասյանը ոստիկանի կողմից տարեց քաղաքացուն ապտակելու վերաբերյալ հանդես է եկել հայտարարությամբ։

Հայտարարությունում ասվում է.

«Խստորեն դատապարտում ենք երեկ Հանրապետության Հրապարակում ոստիկանի կողմից քաղաքացիների նկատմամբ բռնություն կիրառելու փաստը: Թեեւ քաղաքացիներն այս պահի դրությամբ մեզ դիմում-բողոք չեն ներկայացրել, սակայն հաշվի առնելով հատկապես իրավապահներից մեկի անընդունելի կոպիտ վարքագիծը եւ դեպքի հանրային նշանակությունը` սեփական նախաձեռնությամբ վարույթ ենք սկսելու ոստիկանության ծառայողին պատասխանատվության ենթարկելու գործընթացն ուշադրության կենտրոնում պահելու համար:

Ակնկալում ենք իրավապահ մարմինների անհապաղ քայլերը դեպքի հանգամանքներն արագ ու անաչառ ուսումնասիրելու եւ ոստիկանության ծառայողին պատասխանատվության ենթարկելու ուղղությամբ: Ցանկանում ենք վստահ լինել, որ թե Հանրապետության Հրապարակում գտնվող եւ թե այլ հավաքների մասնակիցների նկատմամբ ոստիկանության ծառայողների գործողություններն այլեւս կբխեն միմիայն օրենքից ու բացարձակ անհրաժեշտությունից, եւ կբացառվեն այլ անհամաչափ գործողությունները»: