Տրանսպորտի փոխնախարարը հաճախ մետրոյով է երթևեկում, բայց «ՊԱԶ»-ով մարզեր դեռ չի գնացել

Այսօր լրագրողները տրանսպորտի և կապի փոխնախարար Արթուր Առաքելյանից հետաքրքրվեցին Հյուսիս-հարավ ավտոմայրուղու մասին, թե ինչո՞ւ, մայիս ամսից սկսած, չեն վճարվել այդ ծրագրում ներգրավված քաղաքացիների աշխատավարձերը:

Փոխնախարարը խոստացավ  հետամուտ լինել հարցին և պարզել: «Հյուսիս-հարավ ճանապարհի շինարարական աշխատանքներն այս պահին ընթանում են իրենց հունով, ավելին՝ աշխատանքները նոր թափ են ստացել»,- հավելեց նա։

Խոսելով մարդատար միկրոավտոբուսների տեխնիկական վիճակի մասին` Առաքելյանը նշեց, որ մարդատար տրանսպորտի թարմացումը ծախսեր կպահանջի: Ըստ նրա` Հայաստանի հասարակական տրանսպորտում շահագործվող ուղեւորատար միկրոավտոբուսները պետք է 12 տարվանից հին չլինեն:

Հարցին, թե ինքը երթեւեկո՞ւմ է հին «ԳԱԶել»-ներով կամ «ՊԱԶ»-երով, Առաքելյանը պատասխանեց, որ հաճախ երթեւեկում է մետրոյով, բայց երբեւէ «ՊԱԶ»-ով մարզեր չի գնացել: