Վարչապետը մատնանշում է Հայաստանի էներգետիկ համակարգի վատ վիճակի միայն օբյեկտիվ պատճառները

Այսօր «ՀՀ էներգետիկ համակարգի երկարաժամկետ՝ մինչև 2036թ. զարգացման ուղիները» խորագրով միջոցառման ժամանակ ելույթ ունեցավ ՀՀ վարչապետ Հովիկ Աբրահամյանը` ասելով, որ վերջին տարիներին էներգետիկ համակարգը գտնվում է բարդ ֆինանսական վիճակում: Վարչապետի խոսքով` ներկայումս  էներգետիկ համակարգի առաջ ծառացած են մի շարք օբյեկտիվ խնդիրներ, որոնց լուծման համար քայլեր են ձեռնարկվում: Քայլերից մեկը  «ՀՀ էներգետիկ համակարգի երկարաժամկետ՝ մինչև 2036 թվականը զարգացման ուղիները» ծրագիրն է, որը նպատակ ունի լուծել համակարգի խնդիրները:

 «Էներգետիկ համակարգը գտնվում է ֆինանսական բարդ վիճակում: Դա  ունի իր օբյեկտիվ պատճառները, այն է`  փոխարժեքի տատանում, համաշխարհային ֆինանսական ճգնաժամը և կլիմայական վատ պայմաններ»,- ասաց Հովիկ Աբրահամյանը:

Վարչապետը նշեց, թե համակարգի ֆինանսական առողջացման քայլեր ևս արվում են, որոնք ներառում են նաև շուկայի կառուցվածքի և սակագների մեթոդաբանության վերանայում: Վարչապետը հույս հայտնեց, որ այդ ծրագիրը կնպաստի էներգետիկ համակարգի բերալավմանը, ներդրումների արդյունավետության, սպառողների մատուցված ծառայությունների որակի բարձրացմանը, էներգետիկայի հաշվառման համակարգի արդիականացմանը: