Ակցիզային հարկի ներդրումը կհանգեցնի տրանսպորտի սակագնի հարցի վերաբացմանը. ՀՅԴ Երևանի քաղաքային կոմիտե

ՀՅԴ Երեւանի քաղաքային կոմիտեն հայտարարությւոն է տարածել, որում ասված է. «Վերջին շրջանում էլեկտրաէներգիայի  սակագնի բացթողմանը,  ինչպես նաեւ ավտոմեքենաների լցավորման գազի նկատմամբ կառավարության նախաձեռնած ակցիզային հարկի ներդրումը`  2016թ-ի հունվարից անխուսափելիորեն կհանգեցնեն  Երեւանում տրանսպորտի գործող սակագնի հարցի վերաբացմանը: Երեւանի քաղաքապետարանը նախորդ անգամ հարցի արծարծման ժամանակ այդպես էլ որեւէ լուծում չտվեց, մի կողմից Երեւանի տրանսպորտային կապը ապահովվող  տնտեսվարողների եւ վարորդների, մյուս կողմից հասարակության կողմից բարձրացվող հարցերին: Լուծված չեն նաեւ Երեւանի երթեւեկության  եւ ճանապարհային ցանցի արդյունավետ օգտագործման հետ կապված այնպիսի կարեւոր հարցեր ինչպիսիք են` ճանապարհային երթեւեկության նշանների, կարմիր գծերի, լուսացույցերի, ճանապարհային գծանշանների հետ կապված բազմաթիվ հարցեր:

ՀՅԴ Երեւանի Քաղաքային կոմիտեն գտնում է, որ վերոհիշյալ բոլոր հարցերը պետք է քննարկվեն միասնական հայեցակարգի ձեւավորման, դրա հասարակական լայն քննարկման եւ  բոլոր կողմերի առաջարկներն ու կարծիքները հաշվի առնելուց հետո:

Վերոհիշյալ հարցերի քննարկման համար ՀՅԴ Երեւանի Քաղաքային կոմիտեն  հուլիսի 17-ին  ժամը 11:30-ին Առնո Բաբաջանյան  համերգասրահի (Աբովյան 2) մամլո սրահում կազմակերպում է կլոր սեղան-քննարկում եւ հրավիրում է Երեւանի քաղաքապետարանին, Երեւանի ավագանու խմբակցությունների  ներկայացուցիչներին,  շահագրգիռ հասարակական կազմակերպությունների   եւ քաղաքացիական նախաձեռնությունների ներկայացուցիչներին մասնակցել կլոր սեղան-քննարկմանը»: