Շարժումն այս ձևով կա՛մ կմարի, կա՛մ էլ Վլադիմիր Գասպարյանը կխաչակնքվի ու տանկերը կքշի մեզ վրա

Այն ընթացքը, որը կա, ոչնչի չի բերի. շարժումը կա\'մ կմարի, կա\'մ էլ Վլադիմիր Գասպարյանը կխաչակնքվի ու տանկերը կքշի մեզ վրա: Այսօր լրագրողներին կարծիք հայտնեց դերասան Սերգեյ Դանիելյանը` խոսելով էլեկտրաէներգիայի թանկացման դեմ բողոքի ակցիաների մասին:

Ըստ նրա` հարցի լուծման համար կա մեկ ուրիշ ճանապարհ: «Եկեք` օրական մեկ ժամ անջատենք հոսանքը. իրենք խփում են մեր գրպանին, մենք էլ նրանց գրպանին հարվածենք: Յուրաքանչյուր թաղում եկեք օղակներ ստեղծենք, ես, օրինակ, մեր շենքում վիզ եմ վերցնում թակել բոլորի դռներն ու խնդրել այդ մասին: Ախր, էդ երեխեքը, էդ սիրուն, լուսավոր երիտասարդները, իզուր սպառում են իրենց: Չնայած, մյուս կողմից, ոչ մի բան էլ իզուր չէ, ուղղակի էդ ճանապարն, իմ կարծիքով, ոչ մի տեղ չի տանի»,- ասաց Դանիելյանը:

Նրա կարծիքով` շարժումն այս ձևով ուղղակի փակուղի է գնում: «Այս կերպ հարցը կլուծվի, երբ իշխանավորները միանան ժողովրդին, երբ, ասենք, Վլադիմիր Գասպարյանը ճղի իր բլուզն ու գա, ասի` ժողովո\'ւրդ ջան, ես ձեր կողմից եմ: Իսկ ի՞նչ կլինի հետո, հետո ավելի դժվար կլինի»: