Եռման ջրից տուժած զինվորական ամուսիններից մեկը 85 տոկոս այրվածք է ստացել

«Հրապարակ» թերթը գրել էր, որ Լեռնային Ղարաբաղի Հանրապետությունից օրեր առաջ ուղղաթիռով բարձրաստիճան զինվորական ամուսիններ են այրվածքներով տեղափոխվել Երեւան:

Yerkir.am-ին հաջողվեց պարզել, որ ամուսիններն այրվածքները ստացել են «Արիստոն» ջրատաքացուցիչից թափված` 100-150 լ եռման ջրից: Նախնական տեղեկություններով` հավանաբար, կաթսան պայթել է, ինչն էլ հանգեցրել է դժբախտ դեպքին:
Նշենք, որ ամուսինները կիրակի օրը տեղափոխվել են Երևանի այրվածքաբանական կենտրոն:

Yerkir.am-ի հետ զրույցում կենտրոնի տնօրեն Նորայր Դավիդյանը հայտնեց, որ տուժածները գտնվում են վերակենդանացման բաժանմունքում: Նրա  խոսքով՝  տուժած կինը 30 տոկոս այրվածք է ստացել,  նրա վիճակը բժիշկները գնահատում են միջին ծանրության: Իսկ ամուսինը 85 տոկոս այրվածք է ստացել, վիճակը ծանր է: Դավիդյանի խոսքով՝ ամուսինը ոտքից գլուխ այրվածքներ է ստացել: