Բիբինի լկտի պահվածքը

Այսօր` էլեկտրաէներգիայի սակագնի բարձրացման հարցով խորհրդարանական լսումների ժամանակ, ԲՀԿ խմբակցության ղեկավար Նաիրա Զոհրաբյանը հարց ուղղեց ՀԾԿՀ նախագահ Ռոբերտ Նազարյանին: Նա նախ իր զայրույթը հայտնեց, որ ՀԷՑ-ի տնօրեն Բիբինը չի ներկայացել լսումներին, մանավանդ, որ նա հիմնական զեկույց ուներ:

«Պարոն Բիբինի բացակայությունը համարում եմ ուղղակի արհամարհանք, լկտի վերաբերմունք ՀՀ օրենսդիր մարմնի նկատմամբ: Եթե նա այնքան ողջախոհ ու ադեկվատ է, որ ժամանակ է գտնում ու լրատվական գործակալություններին հարցազրույցներ է տալիս եւ հերթական անգամ չի ընդունում իր մեղքը, ապա կարող էր գալ այստեղ ու բարի լիներ հարցերին պատասխանել»,- ասաց Նաիրա Զոհրաբյանը:

Նա նաև տարակուսեց Նազարյանի այն հայտարարության կապակցությամբ, որ ԲՀԿ խմբակցության հետ քննարկումների ժամանակ ԲՀԿ-ականները առաջարկություններ են ներկայացրել ու ողջունել:

«Տպավորություն կարող է ստեղծվել, թե մենք ողջունում ենք սակագնի բարձրացումը: Խնդրում եմ մանրամասնեք` ինչի մասին է խոսքը, որովհետև հանրությունը տեխնիկական խնդիրների մեջ հաստատ չի խորանա ու սխալ տպավորություն կստանա, թե մենք ինչ-որ բան ենք ողջունել այդ քննարկման ժամանակ»,- ասաց Զոհրաբյանը՝ հավելելով, որ երկու մասնագիտական առաջարկություն է ներկայացրել՝ էներգետիկ համակարգի առողջացման ու այնպիսի մեխանիզմների ներդրման ուղղությամբ, որոնք կնպաստեին հոսանքի գնի իջեցմանը, սակայն ՀԾԿՀ-ն չի ընդունել ԲՀԿ-ի առաջարկները:

Ռոբերտ Նազարյանը նշեց, որ ԲՀԿ-ական Միքայել Մելքումյանն է ներկայացրել: «Եթե Միքայել Մելքումյանը չի ներկայացնում ԲՀԿ-ն...»,- շարունակեց նա:

Հիշեցնենք, որ Yerkir.am-ի հետ զրույցում ՀԷՑ-ի մամլո խոսնակ Նատալյա Սարջանյանը նշել էր, որ Բիբինն ԱԺ գնալու անհրաժեշտություն չի տեսել: