Ծառուկյանը կապ չունի Աբովյանի քաղաքապետի ընտրությունների հետ. նորընտիր քաղաքապետ

Այսօր լրագրողները մի շարք հարցեր ուղղեցին Աբովյանի նորընտիր քաղաքապետ Վահագն Գևորգյանին:

Նախ հարցրեցին, թե ինչո՞ւ էր Գագիկ Ծառուկյանի թիկնազորն ակտիվ գործում ընտրությունների ժամանակ: «Պետք չէ շահարկել Ծառուկյանի թիկնազորը, նրանք ևս Աբովյանի քաղաքացիներ են»,- պատասխանեց Գևորգյանը:

Դիտարկմանը, որ Գագիկ Ծառուկյանը իր՝ Վահագն Գևորգյանի ընտրությամբ ամբողջացրեց իր իշխանությունը Աբովյանում, արձագանքեց. «Մարդիկ համառորեն չեն ուզում հասկանալ, որ Ծառուկյանը կապ չունի այս ընտրությունների հետ»: Իհարկե, չթաքցրեց նաև, որ Ծառուկյանի թիկնազորի պետը՝ Էդոն, իր ընկերն է:

Վահագն Գևորգյանն ասաց, որ մտադիր չէ հանրապետական դառնալ, առաջին գումարման ԱԺ-ից սկսած` աշխատել է տարբեր հանձնաժողովներում՝ որպես փորձագետ, և երբեք կուսակցական չի եղել: «Երեսունից ավելի բակային հանդիպումներ ենք ունեցել ու կարծում եմ՝ դա նույնպես իր դերն ունեցել է»,- ասաց Վահագն Գևորգյանը:

Ի պատասխան հարցի, որ, ըստ ընդդիմության, Աբովյանում Id քարտերով կրկնակի, եռակի քվեարկել են, նա պատասխանեց. «Ինչի՞ մասին է խոսքը, նույնիսկ դիմում-բողոքներ չեղան: Միայն մեկ թերություն կար, ասում էին, որ տրանսպորտով մարդկանց տեղափոխում էին»:

Ըստ Վահագն Գևորգյանի՝ Աբովյանի բոլոր քաղաքապետերն էլ ունեցել իրենց ձեռագիրը, և ինքն էլ պատրաստ է այդ ավանդույթը շարունակել:

Հարցին` արդյո՞ք իրեն ընտրվելու կապակցությամբ շնորհավորել է մրցակիցը՝ Պալաչը, Վահագն Գևորգյանը պատասխանեց. «Ոչ, նա ինձ չի շնորհավորել»: