Ինչո՞ւ էր Բիբինը ԱԺ-ում ՀՀԿ-ականների հետ այդքան «դուխով» խոսել

Այսօր լրագրողների հետ զրույցում ՀԱԿ խմբակցության քարտուղար Արամ Մանուկյանը նշեց, որ այն խախտումներն ու չարաշահումների մեխանիզմը, որոնք հայտնաբերեցին գազի հարցերով ուսումնասիրությունների ժամանակ, գործել են էլեկտրաէներգիայի ոլորտում:

«Էլեկտրաէներգիայի սակագնի բարձրացման ու ոլորտի խախտումների մեջ իշխանությունների մատը խառն է: Բոլոր բարեգործությունները, որ արել է ՀԷՑ-ը, արել է իշխանությունների առաջարկով: Իրենք օպերա են ներկայացրել, եկեղեցու կառուցման հովանավորություն են իրականացրել, մշակութային փառատոներ են իրականացրել, հազար ու մի շինարարական բարեգործություններ են իրականացրել: Տարեկան մոտ 4 միլիոն դոլարի բարեգործություն են արել, և դա արել են ոչ թե իրենց կամքով, այլ իշխանությունների առաջարկով: Եթե Բիբինը գալիս է խորհրդարան ու այսպես «էրքով» է խոսում, համարձակ է խոսում, այն բանի համար, որ ասում է. «Չէ՞ որ ես ինչ արել եմ, ձեր համաձայնությամբ եմ արել, չէ՞ որ ինձ հիմա ինչում մեղադրում եք, ձեր առաջարկով է եղել: Եվ եթե օգնել ենք ձեր եկեղեցիները կառուցելուն, ի՞նչ իրավունքով եք ինձ ասում, թե` էս ինչ ծախսեր ես արել»,- ասաց Արամ Մանուկյանը:

Պատգամավորը վստահ է, որ այդ ճոխ ծախսերից, մեծ կորուստներից, դեբիտորական պարտքերից ու սակագնի բարձրացումից իշխանությունն է շահում: Որքան կորուստները մեծ են լինում, այնքան շատ է փող մտնում բյուջե, այնքան ստվերը շատ է, իսկ որքան ստվերը շատ եղավ, այնքան գողանալու տեղը շատ է լինում:

Պատգամավորը նշում է` այդ ինչպե՞ս հասկանալ, որ գազի ու էլեկտրաէներգիայի համակարգում 6-7 տարի շարունակ կես տոկոս կորուստների պակաս չի եղել, այն դեպքում, երբ հարյուրավոր միլիոնների ներդրումներ են եղել: «Որովհետև կորուստները իշխանությունների հանգիստ ու ստվերային ուտելու տեղն է, ահա, թե ինչու շահագրգռված չեն նվազեցնել կորուստները: 90 հազար դրամ աշխատավարձով հնարավոր չէ էլեկտրիկ պահել մեր երկրում, բայց նրանք այդքան աշխատավարձով 4000 էլեկտրիկ են պահում, որպեսզի նրանք «գողանան», որի մի մասը բարձրանում է «վերև»: Չի կարող այդքան ցածր աշխատավարձով աշխատող էլեկտրիկը ազնիվ գործել, եթե նա գործ ունի օրական 900 հազար դրամի հետ: Տեսուչներին թույլատրել են ստվերային գործարքներ անել, ահա` ինչու կորուստները չեն նվազում: Այնպես որ` ՀԷՑ-ն անում է այն քայլերը, որոնք համաձայնեցնում է իշխանությունների հետ»,- ասաց նա:

Արամ Մանուկյանը լրագրողներին տեղեկացրեց, որ ունի փաստաթղթեր, նամակներ, որոնք վկայում են գործընթացի բազմաթիվ գաղտնի կողմերի մասին: Դրանցից մեկն այն է, որ իրականում Հայաստանը Վրաստանից հոսանք է գնում, դա արտահայտված է Հայաստան-Վրաստան մաքսային մարմինների բալանսում, այն կազմում է 140 միլիոն կիլովատտ/ժամ, որը մեր էներգետիկ բալանսում ընդգրկված չէ, իսկ եթե ընդգրկված լիներ, դա կարող էր բերել էլեկտրաէներգիայի էժանացման: