Հայաստանը համարվում է պարտքի նվազ բեռ ունեցող երկիր. գլխավոր գանձապետ

Այսօր ԱԺ-ում, երբ քննարկվում էր 2014թ. բյուջեի կատարողականը, ՕԵԿ-ական պատգամավոր Հովհաննես Մարգարյանը հարց ուղղեց հիմնական զեկուցող` գլխավոր գանձապետ Ատոմ Ջանջուղազյանին, թե որքա՞ն է կազմում Հայաստանի պետական պարտքը:

Նշենք, որ Ատոմ Ջանջուղազյանը զեկուցելու ժամանակ նշել էր, որ Հայաստանը ցածր պարտքի բեռ ունեցող երկրների ցուցակում է, և պարտքի սպասարկումը ռիսկեր չունի:

«Ինչքա՞ն տեղ ունենք` պարտք վերցնելու, որ հայտնվենք ռիսկային դաշտում»,- հարցրեց պատգամավորը:

Ատոմ Ջանջուղազյանը պատասխանեց, որ պետական պարտքը կազմում է 4 միլիարդ 441 միլիոն դոլար: Իսկ թե որքանով է պարտքը վտանգավոր, դա գնահատվում է որոշակի ցուցիչներով: «Պարտք-ՀՆԱ հարաբերակցությունը երբ գերազանցում է 60 տոկոսը, երկիրը պարտքի տեսակետից գտնվում է ռիսկային գոտում, ինչը սահմանված է երկրի օրենսդրությամբ` «Պետական պարտք մասին» օրենքով»,- ասաց գլխավոր գանձապետը՝ հավելելով, որ նշված ցուցանիշներին Հայաստանը չի մոտեցել, ինչը հիմք է տալիս ասելու, որ ռիսկային գոտում չենք:

«Այս ցուցանիշները հաշվի առնելով` կարող ենք ասել, որ Հայաստանը համարվում է պարտքի նվազ բեռ ունեցող երկիր»,- ասաց Ատոմ Ջանջուղազյանը: