ՀՀԿ-ն մտահոգիչ հարցերը միտինգով չի լուծում, չի մասնակցի բողոքի ցույցին

Այսօր` խորհրդարանական ճեպազրույցների ժամանակ, լրագրողները ՀՀԿ խմբակցության քարտուղար Գագիկ Մելիքյանին հարցրեցին, թե ՀՀԿ-ն կմասնակցի՞  քաղաքացիների նախաձեռնած այն բողոքի ցույցին, որը կկազմակերպվի մայիսի 27-ին` էլեկտրաէներգիայի սակագնի բարձրացման դեմ:

Գագիկ Մելիքյանը պատասխանեց. «Հարցը մտահոգում է բոլորին, այդ թվում` իշխանությանը: Հոսանքի թանկացումը ոչ միայն կբերի սպառման ծավալների նվազման, այլև բացասական հետևանքներ կունենա տնտեսական ակտիվացման վրա, որը պետք մտահոգիչ լինի հենց ՀԷՑ-ի համար: Կարծում եմ, որ Հանրապետականը միտինգային տրամադրություններ չի ունեցել և մտահոգիչ հարցերը միտինգներով չի արտահայտել»: Նա հավելեց, որ իր համար միակ հիմնավոր փաստը հոսանքի գնի թանկացման դեպքում արժույթի տատանումներն են:

Ինչ վերաբերում է էկոնոմիկայի նախարար երվանդ Զախարյանի կողմից հնչեցված այն հայտարարությանը, որ ՀԷՑ-ը գողություն է արել, պատասխանեց. «Գողության համար ոչինչ ասել չեմ կրող, քանի որ փաստեր չունեմ, բայց տեղին են այն մտահոգությունները, որ ՀԷՑ-ում կա անարդյունավետ կառավարում»:

Հարցին, թե ՀՀԿ-ն մտավախություն չունի՞, որ հոսանքի գնի բարձրացման դեմ հնարավոր է` եռյակ կամ քառյակ ձևավորվի՝ ընդդեմ իշխանության, Մելիքյանը պատասխանեց, որ նման բաները ՀՀԿ-ի համար մտահոգիչ չեն: