Կոնգրեսական Ադամ Շիֆը մասնակցել է բողոքի ցույցին՝ ի պաշտպանություն Հայաստանի և Արցախի

Արցախի բնակիչների վրա ադրբեջանական առաջին ռումբերի ընկնելուց մի քանի շաբաթ անց հարյուրավոր մարդիկ են սպանվել կամ վիրավորվել, եւ հազարավոր մարդիկ ստիպված են եղել լքել իրենց տները ու քնել բաց երկնքի տակ: Այս մասին ֆեյսբուքյան իր էջում գրում է ԱՄՆ կոնգրեսական Ադամ Շիֆը:

«Պատմական եկեղեցիներն ու քաղաքները ռմբակոծվել եւ ավերվել են: Սիրիայից ժամանած զինյալներին Ադրբեջանը եւ նրա թուրք հովանավորները օգտագործում են որպես վարձկանների մարտական ուժ: Չնայած այս անօրինական պատերազմին՝ Արցախի ժողովուրդը դեռ կանգնած է: Հայաստանի ժողովուրդը դեռ կանգնած է: Եվ մենք կշարունակենք աջակցել նրանց:

«Շատ երկար Միացյալ Նահանգները պահպանեց կեղծ հավասարությունը Ադրբեջանի հետ, որը հարձակում հարձակման հետեւից է իրականացնում»,- հավելել է նա ու ընդգծել. «Նախագահներ Ալիեւը եւ Էրդողանը պետք է հասկանան, որ չեն կարող երկար տարիների վեճը լուծել խաղաղ բնակչության նկատմամբ ուժի անխնա կիրառման միջոցով»:

Թարգմանությունը՝ news.am–ի