Սուրիկ Խաչատրյանի որդուն հարցաքննել են. Աղվան Հովսեփյան

Սուրիկ Խաչատրյանի որդին քննիչի մոտ է եղել, եւ նրան հարցաքննել են: Այս մասին Ծաղկաձորում մի շարք լրագրողների հետ զրույցում ասաց ՀՀ Քննչական կոմիտեի ղեկավար Աղվան Հովսեփյանը:  Հարցին, թե ինչն էր պատճառը, որ նրան շուտ բերման չէին ենթարկում, Աղվան Հովսեփյանը պատասխանեց, որ դրա համար իրավական ընթացակարգ էր հարկավոր, բացի այդ, միայն բերման ենթարկելը չէ, կան նաեւ հրավիրելու այլ մեթոդներ:

  «Հանրապետությունից 2 հոգի բացակայում էին, սակայն կատարված գործողությունների, այդ թվում` համոզելու արդյունքում,  նրանք ներկայացել են»:

 Աղվան Հովսեփյանը նաեւ նշեց, որ  երկու օր առաջ քննիչները համոզելով տուժած եղբարներից Մուշեղից էլ կարողացել են ցուցմունք վերցնել հիվանդանոցում:

Yerkir.am-ի հարցին, թե որն էր ծեծկռտուքի շարժառիթը, Աղվան Հովսեփյանը պատասխանեց. « Շարժառիթներն էական չեն, կենցաղային հողի վրա են եղել»:

 Հարցին, թե ճիշտ էր արդյոք այս դեպքով գործ հարուցել ՀՀ ՔՕ 258-րդ հոդվածի` խուլիգանության  հատկանիշներով, Աղվան Հովսեփյանը պատասխանեց, որ խուլիգանությունը որպես հանցակազմ բարդ է իր որակման տեսանկյունից:

Քննչական կոմիտեի նախագահը մեջբերեց Վճռաբեկ դատարանի  նախադեպային որոշումները, որոնց համաձայն խուլիգանություն է դիտվում այն արարքը, որը կատարվում է ուղղակի դիտավորությամբ եւ ուղղված է հասարակության դեմ: Սակայն ճիշտ էր արդյոք այս հոդվածով հարուցել քրեական գործ, թե ոչ, Հովսեփյանը պատասխանեց, որ կարող է հստակ պատասխանել  քննության ավարտից հետո: