Որևէ բան չի պատահել. Գալուստ Սահակյանը` հայ-վրացական սկանդալի մասին

Այսօր ԱԺ արտահերթ նիստում ՕԵԿ-ական Հովհաննես Մարգարյանը վարման կարգով խոսեց հայ-վրացական հարաբերությունների մասին:

«Վերջին օրերին իրարամերժ տեղեկություններ են տարածվել մամուլում` կապված հայ-վրացական հարաբերություններում վերջին զարգացումների հետ»,- ասաց նա:

Հիշեցնենք, որ ԱԺ նախագահ Գալուստ Սահակյանի և Հարավային Օսիայի ինքնահռչակ հանրապետության խորհրդարանի նախագահ Անատոլի Բիբիլովի միջև հանդիպում է եղել, որը հարուցել է Վրաստանի դժգոհությունը: Մասնավորապես երեկ Վրաստանի վարչապետը զանգահարել է ՀՀ վարչապետ Հովիկ Աբրահամյանին եւ պարզաբանումներ պահանջել, իսկ Վրաստանում ՀՀ դեսպան Յուրի Վարդանյանին հրավիրել են Վրաստանի ԱԳՆ` բացատրություններ տալու: 

Պատգամավորը, դիմելով Գալուստ Սահակյանին, ասաց. «Կուզենայի Ձեզանից մանրամասներ իմանալ, որպեսզի տեղեկացված լինենք: Ավելին` պարո'ն Սահակյան, պատրաստակամ ենք, եթե անհրաժեշտություն կա, կազմակերպել հայ-վրացական պատգամավորական խմբի հանդիպումներ: Այն, ինչի մասին գրվում է, ինչքանո՞վ է լուրջ, իրական, որպեսզի տեղեկացված լինենք, մանրամասները բոլորին են հետաքրքրում»:

Գալուստ Սահակյանը կարճ արձագանքեց. «Որևէ բան չի պատահել»: