Դաշնակցականները ձեռք են բերել ընտրողների հավատն ու վստահությունը. Արթուր Աղաբեկյան

Արդեն տեղեկացրել ենք, որ այսօր Արցախի` մայիսի երեքին կայանալիք խորհրդարանական ընտրությունների քարոզարշավի վերջին օրն է:

«Հայ Յեղափոխական Դաշնակցություն» կուսակցության ներկայացուցիչները այսօր հանդիպում ունեցան դիտորդական առաքելություն իրականացնողների և իրենց ընտրողների հետ` ամփոփելու քարոզարշավը, որից հետո ընտրողները հնարավորություն ունեցան ունկնդրելու Դաշնակցության կազմակերպած համերգը:

 Տեղեկացնենք, որ ՀՅԴ ցուցակը գլխավորում է ԼՂՀ փոխվարչապետ Արթուր Աղաբեկյանը: Նա իր ելույթում նշեց, որ դաշնակցական քարոզչական խմբերը շուրջ չորս հարյուր համայնքներում ընտրողների հետ ունեցել են հանդիպումներ, որոնց ընթացքում համոզվել են, որ իրենց աշխատանքները զուր չեն անցել, և Դաշնակցությունը ձեռք է բերել ընտրողների հավատն ու վստահությունը:

«Մինչև մեր քարոզարշավը մեր ժողովրդի յոթանասուն տոկոսը տեղյակ չէր, թե ես ինչ կապ կարող եմ ունենալ ՀՅԴ-ի հետ, ուստի մեր քարոզարշավներն ունեցան իրենց դրական ազդեցությունը նաև այս առումով»,- ասաց Աղաբեկյանը:

Տեղեկացնենք, որ խորհրդարանական ընտրություններին մասնակցելու են նաև «Շարժում -88», «Խաղաղություն և զարգացում», Լեռնային Ղարաբաղի կոմունիստական, Արցախի Ժողովրդավարական, «Ազգային վերածնունդ», «Ազատ հայրենիք» կուսակցությունները: