Չարբախում երկու անձի աղմկահարույց սպանության գործով դատավարությունը հետաձգվեց մինչև աշուն

Շենգավիթ վարչական շրջանի ընդհանուր իրավասության դատարանում՝ դատավոր Նելլի Բաղդասարյանի նախագահությամբ այսօր պետք է մեկնարկեր 2016 թվականի նոյեմբերի 13-ին Չարբախում տեղի ունեցած` երկու անձի աղմկահարույց սպանության գործով առաջին դատական նիստը: Դատավորը տեղեկացրեց, սակայն որ աշխատանքային ծանրաբեռնվածությունից ելնելով հնարավոր չի եղել դատական նիստին ապահովել ամբաստանյալների ներկայությունը: Նիստին ներկա չէր նաև մեղադրող դատախազը: Այսպիսով այօրվա դատական նիստը հետաձգվեց մինչև աշուն:

Yerkir.am-ի տեղեկություններով՝ ամբաստանյալների ներկայությունը դատական նիստին հնարավոր չի եղել ապահովել ուղեկցող ոստիկանների սակավաթիվ լինելու պատճառով: Բանն այն է, որ այսօր Ավան և Նորք-Նորք վարչական շրջանների ընդհանուր իրավասության դատարնում ընթանում էր «Սասնա ծռերի» գործով հերթական դատական նիստը, որտեղ, ինչպես հայտնի է ուժեղացված ծառայություն են իրականացնում ուղեկցող ոստիկաններն ու դատական կարգադրիչները:

Այս գործով ամբաստանյալի աթոռին են հայտնի քրեական հեղինակություն Նորատուսցի Ալիկը՝ Ալիկ Բանդությանը, նրա մտերիմ` Բդո մականունով հայտնի Արմեն Գասպարյանը և Չարբախցի Գեղամ մականունով հայտնի Պետրոս Իսրայելյանը: Նորատուսցի Ալիկի և Չարբախցի Գեղամի նկատմամբ խափանման միջոց է ընտրվել կալանավորումը, իսկ Արմեն Գասպարյանի՝ Բդոյի նկատմամբ կիրառվել է գրավ: