Փաստաբանին սպառնացած քաղաքացին քրեական հետապնդման չի ենթարկվի

Փաստաբան Սեդա Սաֆարյանի նկատմամբ հնչեցված սպառնալիքների վերաբերյալ ԶԼՄ-ներում հրապարակված` հանցագործության մասին հաղորդումն ուսումնասիրելու արդյունքում ՀՀ ոստիկանությունը մերժել է նշված փաստի առթիվ քրեական գործի հարուցումը:

Փաստաբանը yerkir.am-ի հետ զրույցում հայտնեց, որ այդ մասին իրեն տեղեկացրել է Վարդենիսի տարածաշրջանի ոստիկանության պետը: Ըստ նրա՝ ոստիկանները զրուցել են իրեն սպառնացած Աղաբեկ Սարգսյանի հետ, նա էլ պարտավորվել է չխոչընդոտել իր մասնագիտական գործունեությանը:

Սաֆարյանը չի պատրաստվում բողոքարկել քրեական գործ չհարուցելու որոշումը: «Ես չեմ կարող հավասարվել նրանց մակարդակին ու նրա նկատմամբ քրեական հետապնդում կայացնելու պնդումները շարունակել»,- ասաց նա:

Հիշեցնենք, որ հայտարարությունը տարածել էր փաստաբանի եղբայրը` քաղաքագետ Ստյոպա Սաֆարյանը: Նա հայտնել էր, որ ապրիլի 2-ին հեռախոսազանգ է ստացվել Սեդա Սաֆարյանի բջջային հեռախոսին, եւ մի տղամարդ անվայել, վիրավորական արտահայտություններ ու սպառնալիքներ է տեղացել փաստաբան Սեդա Սաֆարյանի ու նրա ընտանիքի հասցեին՝ փաստաբանի ծավալած մասնագիտական գործունեության կապակցությամբ: