Որոշ երկրներ շարժվում են կոնյունկտուրային, վայրկենական շահերով. ՌԴ Պետդումայի պատգամավորը՝ Ցեղասպանության չճանաչման մասին

«Հայոց ցեղասպանությունը խլեց մեկուկես միլիոն մարդկանց կյանք, և հիշողությունը նրանց մասին մշտապես ապրելու է հայ ժողովրդի սրտում»,- այսօր «Ընդդեմ ցեղասպանություն հանցագործության» գլոբալ ֆորումի ժամանակ ասաց ՌԴ Պետդումայի պատգամավոր Գալինա Կարիլովան:

Ըստ նրա` ՌԴ-ն մշտապես հայ ժողովրդի ցավը որպես սեփական ցավ է ընկալել, այդ պատճառով էլ այդ ողբերգական տարելիցն արժանացել է նման արձագանքի:

Ռուս պատգամավորը նաեւ հայտնեց, որ ՌԴ տարբեր քաղաքներում տարատեսակ միջոցառումներ են իրականացվում՝ Հայոց ցեղասպանության հարյուրերորդ տարելիցի հետ կապված: Նա ընդգծեց, որ Ռուսաստանը կանգնած է Հայոց ցեղասպանության ճանաչման ակունքներում, և 1915 թվականին տեղի ունեցած դեպքերը ցնցել էին ռուս հասարակությանը, որը ցավով ու ցասումով խոսում էր դրա մասին:

Կարիլովան նշեց, որ ցավալի է, բայց կան երկրներ, որոնք դեռևս չեն ճանաչել Հայոց ցեղասպանությունը՝ ելնելով «կոնյունկտուրային, վայրկենական շահերից»: Ըստ նրա՝ գերակայությունը պետք է լինի ջանքերի միավորումը Ցեղասպանության դեմ պայքարում:

«Մեր պետությունն առաջնորդվում է պատմական հիշողությունը պահպանելու սկզբունքով, և ՌԴ նախագահն իր այցի ժամանակ մասնակցելու է 100-ամյա տարելիցին նվիրված միջոցառումներին»,- ասաց ռուս պատգամավորը:

Եզրափակելով նա նշեց, որ որոշ երկրներում նացիզմը կրկին գլուխ է բարձրացնում և պետք է պայքարել դրա դեմ, հետո հավելեց, որ հայերի ցեղասպանությունը եւ նացիզմը թեեւ տարբեր ժամանակաշրջաններում են եղել, բայց դրա հիմքում ընկած է եղել ատելությունը այլ ազգերի հանդեպ եւ ազգայնականությունը: