Կինոյի մասին օրենքը պետք է նաև ցենզուրա պարունակի. Ալեքսանդր Խաչատրյան

Կինոյի մասին օրենքի նախագծի մշակմանը պետք է մասնակցեն կինոգործիչները, ոչ թե մշակույթի նախարարության անդամները: Այսօր լրագրողների հետ հանդիպման ժամանակ հայտարարեց դերասան Ալեքսանդր Խաչատրյանը:

Ըստ նրա` օրենքը պետք է լինի արտոնությունների և սահմանափակումների մասին օրենք, որը թույլ չի տա, որ ամեն մարդ մտնի կինոյի ոլորտ:

«Այն նաև որոշ չափով պետք է ցենզուրա մտցնի, բայց սովետական մակարդակի ցենզուրայի մասին չէ խոսքը: Հասկանո՞ւմ եք` գոնե հեռուստատեսությունը և կինոն պետք է մի քիչ «պլենդուզի» մակարդակից բարձր լինեն, և հեռուստասերիալն էլ պետք է լինի գեղարվեստական գործ, եթե, իհարկե, այնտեղ պատահական մարդիկ չաշխատեն»,- ասաց Խաչատրյանը` հավելելով, թե չի կարելի փողոցի կեղտը լցնել կինո:

Ի դեպ, նա տեղեկացրեց, որ երեկ է Հայաստան վերադարձել` գեղարվեստական ֆիլմում նկարահանվելու համար: