Սյունիքի նախկին մարզպետը միայն գրավոր հարցերի է պատասխանում

ՀՀ տարածքային կառավարման նախարարության ջրային տնտեսության նախկին պետ, Սյունիքի նախկին մարզպետ Վահե Հակոբյանը մինչև կոկորդը կուշտ է պետական աշխատանքից: Մամուլում շրջանառվող տեղեկությունների համաձայն՝ Վահե Հակոբյանն իր մերձավորներին հայտարարել է, թե այլևս երբեք չի աշխատի պետական համակարգում, քանի որ ափսոս են իր ջահել տարիները, որ մաշում էր կաբինետներում: Նա նշել է, որ այժմ տնօրինում է իր ժամանակը, ինչպես ուզում է և զբաղված է Հայաստանի սահմաններից դուրս իր բիզնեսների ընդլայնմամբ:

Yerkir.am-ը կապ հաստատեց Վահե Հակոբյանի հետ՝ տեղեկանալու՝ պետական համակարգում հարմար պաշտոն զբաղեցնելու գայթակղությանն արդյոք պատրա՞ստ է դիմակայել և մերժել առաջարկները, չէ՞ որ բոլորին է հայտնի՝ ինչ լծակներով ու ռեսուրսներով են օժտված բարձրաստիճան պետական սեկտորի ներկայացուցիչները: Մեր այս հարցը լսելուց հետո, մինչ այդ բոլորովին էլ շտապողի տպավորություն չթողնող Վահե Հակոբյանը ասաց, որ շտապում է և չի կարող մեր հարցին պատասխանել:

Սյունիքի նախկին մարզպետը մեր հեռախոսազրույցի վերջում հորդորեց իրեն միայն գրավոր հարցերով դիմել և անմիջապես անջատեց հեռախոսը: