Վահե Էնֆիաջյանին կփոխարինի Վահան Բաբայանը

Այսօր ՀՀ ԱԺ եվրոպական ինտեգրման հարցերի մշտական հանձնաժողովը նիստ էր գումարել` հանձնաժողովի նախագահ Նաիրա Զոհրաբյանի գլխավորությամբ` քննարկելու ՀՀ-ԵՄ հետագա համագործակցության օրակարգը:

Նիստին մասնակցում էր ԵՄ խորհրդի Արեւելյան Եվրոպայի եւ Կենտրոնական Ասիայի հարցերով աշխատանքային խումբը, որը փաստահավաք առաքելությամբ է Հայաստանում՝ ՀՀ-ԵՄ հարաբերությունների հետագա օրակարգի շուրջ խնդիրները ԵՄ խորհրդին ներկայացնելու համար:

ԵՄ խորհրդի Արեւելյան Եվրոպայի եւ Կենտրոնական Ասիայի հարցերով աշխատանքային խմբի ղեկավար Պետերի Վուորիմակին իր խոսքում նշել է, որ Հայաստանը ԵՄ-ի համար կարեւոր գործընկեր է, եւ հույս է հայտնել, որ ՀՀ-ԵՄ փոխադարձ համագործակցությունը առավել կզարգանա ու կխորանա:

ԱԳ փոխնախարար Շավարշ Քոչարյանը նշել է, որ ԵՄ-ն եղել և մնում է Հայաստանի կարեւոր գործընկերներից, և որ Հայաստանը շահագրգիռ է խորացնելու համագործակցությունը ԵՄ- ի հետ՝ հաշվի առնելով նաեւ ԵՏՄ-ում ստանձնած պարտավորությունները:

Նա տեղեկացրել է, որ նախատեսվում են աշխատանքային քննարկումներ ԵՄ-ի հետ առաջիկա համագործակցության առեւտրատնտեսական բաղադրիչի շուրջ, որին կհաջորդեն նաեւ քաղաքական խորհրդակցություններ ՀՀ-ԵՄ համագործակցության նոր ձեւաչափերի վերաբերյալ:

ՀՀԿ, ԲՀԿ, ՀԱԿ, ՕԵԿ եւ «Ժառանգություն» խմբակցությունների ներկայացուցիչները կարևորել են այն հանգամանքը, որ Հայաստանը պատրաստ է ստորագրել Ասոցացման համաձայնագրի քաղաքական բաղադրիչը: Հանձնաժողովի որոշմամբ՝ Արեւելյան գործընկերության` Ռիգայի գագաթաժողովին ընդառաջ՝ ապրիլի 17-ին, կանցկացվեն խորհրդարանական լսումներ:

Քննարկվել է նաեւ հանձնաժողովի նախագահի տեղակալի հրաժարականի եւ նոր տեղակալի ընտրության հարցը: Հանձնաժողովի նախագահի տեղակալի պաշտոնում Վահե Էնֆիաջյանին այսուհետ կփոխարինի Վահան Բաբայանը: