Նախագահի համակուրսեցու դպրոցում խախտումների հետ կապված պատկերը փոխվեց

Մարտի 4-17-ը Երևանի Մոնթե Մելքոնյանի անվան թ.11 հիմնական դպրոցում իրականացվեց Երևանի քաղաքապետի հանձնարարությամբ ստեղծված վերահսկողության վարչության ուսումնասիրությունը, որին քաղաքապետի առաջարկով մասնակցել եմ նաև ես:

Ուսումնասիրության առարկան 2013 և 2014թթ. դպրոցի նախահաշիվներով նախատեսված 13.7 մլն պարգևավճարների հասցեականությունը ստուգելն էր, որին կառավարման խորհրդի որոշմամբ արժանացել էին դպրոցի 235 աշխատակիցներ: Ինչպես նշել էի փետրվարի 26-ի ասուլիսում, 2014թ. պարգևատրված անձանց ցուցակում բացակայում էր 42-րդը, 5 անուն ազգանուն' 2013-2014 թ.թ. տարիֆիկացիայում: Ուսումնասիրության ընթացքում պարզվեց, որ գործավարը պարգևատրվածների ցուցակն արտատպելիս 42-րդ համարին բաց է թողել, ուսուցչուհիներից մեկն ամուսնացել և ազգանունը տարիֆիկացիայում փոխվել է, իսկ պարգևատրվածների ցուցակում'ոչ, մնացած 4 պարգևատրվածները փոխարինող ուսուցիչներ էին, այդ պատճառով տարիֆիկացիայում ներառված չեն անունները, այնինչ լավ կլիներ, որ ինչպես որոշ դպրոցների տարիֆիկացիաներում է նշվում, այստեղ էլ ֆիզարձակուրդում գտնվողների անունների դիմաց նշվեր: Իսկ ինչպես է եղել, որ նույն հրամանով, նույն օրը ջոկատավարի մեկ հաստիքի վրա տնօրենն ընդունել է երկու հոգի, հրամաններից պարզվեց, որ իրականում նրանք տարբեր ժամանակ են հրամանագրվել, ուղղակի տարիֆիկացիան արտագրելիս գործավարը երկու տարբեր անձանց դիմաց նույն հրամանն է գրել:

Ուսումնասիրության ընթացքում պարգևատրումների հասցեականությունը ստուգվել է մանրամասնորեն, հաշվապահի կողմից ներկայացվել են բանկային փոխանցումների վերաբերյալ բոլոր անհրաժեշտ փաստաթղթերը և խախտումներ չեն արձանագրվել:

Այսպիսով, չնայած իմ հրապարակած կասկածներին, Երևանի Մոնթե Մելքոնյանի անվան թ.11 հիմնական դպրոցում իրականացված ուսումնասիրությունը ոչ միայն ցրեց այդ կասկածներն այլ ընդհակառակը, համոզվեցի նրանում, որ չնայած վերոնշյալ որոշ թերացումների, դպրոցում տնօրենի կողմից հսկայական աշխատանք է տարվում կրթության որակը բարձրացնելու ուղղությամբ, սակայն զարմանալի է, որ դպրոցների վարկանիշավորման ցանկում այն 120-րդ տեղում է:

Անահիտ Բախշյան

Երևանի ավագանու «Բարև Երևան» խմբակցության անդամ

Հիշեցնենք, որ տիկին Բախշյանը մինչ այդ հայտարարել էր, որ մի շարք խախտումներ է հայտնաբերել վերոհիշյալ դպրոցում: Ի պատասխան, դպրոցի տնօրեն Ռուզաննա Ազիզյանն ասել էր, որ պատրաստվում է դատի տալ Բախշյանին: