Եթե հիմա ժխտում եք, որ Ռուսաստանը ագրեսոր է, ինչպե՞ս կարող եք ամբողջ աշխարհից պահանջել, որ ճանաչեն հայերի ցեղասպանությունը. Տարասյուկի նյարդերը տեղի են տվել

Այսօր «Եվրանեսթ»-ի խորհրդարանական վեհաժողովի համանախագահ Բորիս Տարասյուկը, ով Ուկրաինայից է, լրագրողների հարցերին պատասխանելիս բողոքեց, որ հայերը Ռուսաստանի քարոզչության ազդեցության ներքո ճիշտ չեն ընկալում այն, ինչը տեղի է ունենում Ուկրաինայում: Հետո նրա նյարդերը տեղի տվեցին, և նա Ուկրաինայում կատարվող իրադարձությունները համեմատեց Հայոց ցեղասպանության ճանաչման պահանջի հետ:

«Կյանքըն ավելի դաժան է, քան հայտարարությունները, որոնք  հնչում են ուկրաինական հակամարտության վերաբերյալ: Պուտինը միակողմանի ագրեսիա է սկսել Ուկրաինայի դեմ ու կանգ չի առնում: Եվ ի՞նչ գործիքներ է հնարավոր առաջարկել, որ այդ ագրեսիան դադարեցվի: Չլիներ այդ ագրեսիան, ոչ մի պատժամիջոց էլ ԵՄ-ի կողմից չէր լինի: Ռուսական քարոզչությունը Հայաստանում շատ արդյունավետ է անցնում, որովհետև ամբողջ ԱՄՆ-ը և Եվրոպան համարում են, որ Ռուսաստանը ագրեսոր է, իսկ Հայաստանում այդպես չեն համարում:

Դա նույնն է, որ դուք տարիներով խոսում եք հայերի ցեղասպանության մասին, և որևէ մեկը դա փորձում է ժխտել: Եթե դուք հիմա ժխտում եք, որ Ռուսաստանը ագրեսիա է իրականացրել Ուկրաինայի հանդեպ, ապա ինչպե՞ս կարող եք ամբողջ աշխարհից պահանջել, որ ճանաչեն այդ ցեղասպանությունը»,- ասել է Բորիս Տարասյուկը: