Երբ մենք՝ հրեաներս, ժխտում ենք Հայոց ցեղասպանությունը, ուրանում ենք մեր իսկ զոհերի հիշատակը. հրեա պատմաբան

Այսօր Կարեն Դեմիրճյանի անվան մարզահամերգային համալիրում ընթացող` «Ընդդեմ ցեղասպանություն հանցագործության» գլոբալ ֆորումի ժամանակ ելույթ ունեցավ հրեա պատմաբան Յաիր Աուրոնը:

Նա նախ նշեց, որ Իսրայելը չի ճանաչում Հայոց ցեղասպանությունը, ավելին` ժխտում է այն, այնինչ` առաջինը պետք է ճանաչեր:

«Երբ մենք` հրեաներս,  ժխտում ենք Հայոց ցեղասպանությունը, ուրանում ենք մեր իսկ զոհերի հիշատակը: Եթե մարդկությունը չի հասկանում ցեղասպանության պարզ դասերը, ոճրագործությունն անպայման մի օր կրկնվում է»,- ասաց պատմաբանը:

Հրեա պատմաբանը հավելեց. «Չտեսնված բան է, որ հայերը Հայոց ցեղասպանության մասին խոսելիս խոսում են նաև այլ ցեղասպանությունների մասին: Ես շատ կցանկանայի, որ իմ երկիրն էլ ունենար նույն համարձակությունը, որը դուք ունեք: Դուք ցեղասպանության և ժխտողականության զոհ եք: Եթե Ցեղասպանությունն անգամ ճանաչվի, ցավը չի թեթևանալու: Հարկավոր է գտնել ճանապարհ՝ շարունակելու վերապրելու պայքարը: Ցավոք, ձեր այդ պայքարը դեռ ավարտված չէ: Երբ նայում ես Ղարաբաղի հարցին, դա ավելի քան պարզ է դառնում»մ- ասաց Յաիր Աուրոնը:

Հրեա գիտնականի համոզմամբ` Թուրքիան առանց Հայոց ցեղասպանության ճանաչման չի կարող դառնալ ժողովրդավար երկիր: «Թուրքերը պետք է ճանաչեն Ցեղասպանությունը՝ դուրս գալով ժխտողականության օղակից: Ինչպե՞ս է հնարավոր, որ Հայոց ցեղասպանությունից հարյուր տարի անց ընդամենը քսանչորս երկիր է ճանաչել պատմական իրողությունը: Ցեղասպանությունը չի ճանաչել ԱՄՆ-ը, չի ճանաչել նաև Գերմանիան, որն, իր անցյալից ելնելով, առաջիններից մեկը պետք է գնար այդ քայլին: Իհարկե, ամենավատը անտարբեր դիտորդ լինելն է: Մարդիկ ամեն րոպե աշխարհի տարբեր անկյուններում սպանում են միմյանց, իսկ մենք ոչինչ չենք անում: Ես ավելի ու ավելի եմ համոզվում, որ եթե զոհի կողմը չենք, ուրեմն ոճրագործի կողմն ենք, երրորդ կողմ գոյություն չունի»,- ասաց Յաիր Աուրոնը: